Rada za nastupnosći Serbow pśi krajnem sejmje jo nejwažnejšy politiski gremium Serbow w Bramborskej. Južo 30 lět mamy Serbsku radu, a něnto se nowa rada wuzwólijo, to buźo pón ta 7. Serbska rada. Sobotu, 08. junija, w Lěšćach jo był oficialny natakt wuzwólowanjow, na głownej zgromaźinje domowinskeje župy Dolna Łužyca. Pśedsedaŕka wólbnego wuběrka Margit Neugebauer z Kózlego jo Domowinarjow wubuźiła na kuždy part se wobźěliś. Marcus Końcaŕ, jadnaŕ Domowiny, jo pśilubił pódpěru z boka Domowiny.

Kak jo móžno se wobźěliś ako jadnotliwc?

Wólbny wuběrk jo zarědował jaden internetny bok, źož su wšykne formulary, se wě, teke informacije. Rozsudnje jo se daś zapisaś do zapiska wólarjow. Tak ako južo slědny a pśedslědny raz. Bóžko musy wólbny wuběrk kuždy raz pó wuzwólowanjach ten zapisk nicyś, togodla njama nowy wólbny wuběrk te adresy a musy ceło nowo zachopiś. To jo dla šćita datow. Kuždy, kenž co se wobźěliś, ten musy jaden formular wupołniś, pódpisaś a wólbnemu wuběrkoju daś. To źo pśez post, pśez mejl abo direktnje do jich kašćika: maju swój wólbny běrow w Dešnje na Tylcyc dwórje. Móžno jo to wšykno do 28. oktobra. Dostanjośo pón pśez post wólbny lišćik a ten dej slědk na wólbny běrow do 15. decembra. Toś ten ceły procedere jo komplicěrowany, ale njejźo hynac.

Kak źěła Serbska rada?

Serbska rada drje njama direktnje něco póstajiś w kněžaŕstwje. Ale wóni maju direktny drot k partajam a ministaŕstwam. Na pósejźenjach Serbskeje rady su pśecej zastupniki stronow, aby informěrowane byli a Serbsku radu pódpěrowali, z nimi wšake wuwójowali. Na taki part su wjele dojśpili, na pśikład wěcej wobšyrnu nowu serbsku kazń a zagronitego za to serbske w kněžaŕstwje z głownoamtskim referentom. Wósebnje na kubłańskem pólu stawnje wójuju a su na pśikład dojśpili, až Witaj-wucba wóstanjo a až ma serbska wucba lěpšy kazniski zakład.
Wójuju lětadłujko za to, až to serbske we wšyknych šulach tema jo. Zastupniki kubłańskego ministaŕstwa tak ako kulturnego ministaŕstwa su pśecej pśibytne na pósejźenjach Serbskeje rady a muse na wše pšašanja wótegroniś a gaž njejźo dalej do směra Serbow, muse wótegroniś, cogodla.
Stawnje lěpše pśipóznaśe Serbskeje rady se na pśikład we tom wótbłyšćijo, až ma pśedsedaŕka rady pšawo pśed krajnym sejmom powědaś. Wó to su dawno wójowali a to jo znamje za to, až serbske naše zastupniki su źěl našogo krajnego parlamanta.
Aby to wšykno dojśpili, muse cłonki Serbskeje rady wjele wjele casa inwestěrowaś. Nic jano, aby pśigótowali te pósejźenja, ale su cesto w Pódstupimje dla rozgronow a jadnanjow. Paralelnje k tomu muse kontakt k serbskej bazy źaržaś. Chtož se za taki amt zajmujo, móžo se naraźiś daś wót swójogo towaristwa.
Chtož co nejpjerwjej se woglědaś, kak Serbska rada źěła: Pśiduce pósejźenje buźo 9. julija, zasej w krajnem sejmje w Pódstupimje. To buźo 38. wobradowanje aktualneje legislatury.

Wahl des 7. Sorbenrates

Die im Land Brandenburg und Freistaat Sachsen lebenden Sorben/Wenden sind eine der vier anerkannten autochthonen Minderheiten/Volksgruppen in Deutschland.
Gemäß Artikel 25 Absatz 1 der Brandenburger Landesverfassung hat das Land, neben Schutz und Förderung, die wirksame politische Mitgestaltung des sorbischen/wendischen Volkes zu gewährleisten. Hierzu hat es nach § 5 des Sorben/Wenden-Gesetzes den Rat für Angelegenheiten der Sorben/Wenden geschaffen. Dieser berät den Landtag und die Landesregierung sowie ihre Behörden, wenn sorbische/wendische Belange berührt werden.
Der Rat wirkt auf Grundlage der Geschäftsordnung des Landtages Brandenburg an der parlamentarischen Arbeit mit.

Bei der Hauptversammlung des Domowina Regionalverbandes Niederlausitz am 8. Juni in Hornow startete die diesjährige Wahl des 7. Rates für Angelegenheiten der Sorben/Wenden. Details zum Wahlprozedere finden Sie auf der Seite des Wahlausschusses zur Sorbenratswahl (siehe Info Box).