Starali su se wó Pratyju za lěto 2025 Janka Pěčkojc de Levano, redaktorce źiśeceje Pratyje Ingrid Hustädtowa a cerkwinych bokow Martina Golašojc. Ceptaŕ na wuměńku Peter Becker jo wótněnta zagronity za te fota. Kóńc septembra jo měła Pratyja swóju premjeru w Njabožkojcach. Martina Golašojc Wam pórucyjo nowy knigłowy kalendaŕ z Ludowego nakładnistwa Domowina - lektěru za šere nazymske a zymske wjacory. Wurězki cytaju Fabian Kaulfürst, Katalin Porackojc, Jakob Priedigkeit a Paulina Albertojc.

Ende September wurde der beliebte niedersorbische Buchkalender Pratyja 2025 in Naundorf der Öffentlichkeit präsentiert. Pratyja Redakteurin Martina Gollasch stellt den Kalender vor.

Jeje lětosna titelna wjas su Njabožkojce/Długi w Błotach a znaty błotojski fotograf Peter Becker ma lětosa swóju premjeru ako fotograf Pratyje, kenž wótmólujo žywjenje w titelnej jsy. Nowum jo, až póbitujo Pratyja teke nimski pśełožk tych woblubowanych wupisow ze starego Casnika, ak wulicuju wó žywjenju titelneje jsy w něgajšnych casach. Źiśi namakaju nowu rubriki "Źiśi pišu za źiśi" a w Pratyji za kśesćijanow cytaśo tenraz mjazy drugim wó Sprjewinych dupjenjach. W nimskem źělu zgónijośo, lěc jo naš kokot napšawdu nałog prastary serbski, typiski dolnołužyski a jadnorazny na swěśe. Dalšnych pśinoskow z pjera dogromady 22 našych awtorkow a awtorow ako teke z derbstwa našogo pismojstwa jo wjele, tak až lazowanje Pratyje se lonujo zas za kuždego!

Sćo ga něnto narske? Naš woblubowany dolnoserbski knigłowy kalendaŕ jo na pśedań w Serbskej kulturnej informaciji Lodka a błośańskem pawiljonje na dwórnišću w Chóśebuzu, w knigłowej loźe Lesezeichen w Bórkowach, w domowniskem muzeumje w Dešnje, w janšojskem Konzumje a na Michelbergerojc farmje w Njabožkojcach. Teke online móžośo sebje jen skazaś abo pla Heika Loberta pód telefonowym cysłom: 0172/790 32 67.