Startujomy źinsa kalendariski do nalěta. Dokradnje jo to było źinsa rano šesć minutow pó styrich (04:06). W tom casu jo stojało słyńco rownopadnje k ekwatoroju. Tak se to woblicyjo. A źinsa stej noc a źeń jadnak dłujkej.
***
Źinsa jo teke swětowy źeń poezije, wót UNESCO póstajony. My comy recitěrowaś Mjertina Lejnika ze Šejnejdy, Hanelora Handrekojc to cyni:
"Nalěto" (baseń)
"Z poeziju we wutšobje": Sobotu, 22. měrca, zeger 11:00 wótmějo se w měsćańskej bibliotece how w Chóśebuzu zarědowanje k swětowemu dnju poezije. Organizatorka zarědowanja, ukrainska spisowaśelka Natalija Gajvoronska, co, až se woglědowarje zanuriju do magiskego swěta poezije. K muzikaliskemu pódmólowanju recitěruju wobydlarje města twóŕby nimskich, ukrainskich a teke serbskich awtorow. Sćo wšykne pśepšosone!
***
Witśe (21.03.) wótwórijo se w Serbskem muzeju w Chóśebuzu nowa wustajeńca, źož źo teke wó poeziju. Titel wustajeńce jo "Christina Grätz - poezija pśirody". W tej wustajeńcy trjefi serbske wuměłstwo na awstralisku wašnju mólowanja, tak mjenowane Dot-Painting.
***
Wušej 130 luźi wótcakuju źinsa na prědnem dnju konference "Serbske žywjeńske rumy w digitalnej dobje" w Chóśebuzu. Nejskerjej se to njemysliš - ale mjeńšyna abo mjeńšynowa rěc a digitalizacija - tam dajo kradu wjele wulicowaś. Nowe technologije w serbskej rěcy, kake šansy wóni maju za zachowanje našeje kultury a teke kake tšachy dajo? W pśirownanju z drugimi mjeńšynami abo wětšynu, źo su Serby w digitalizaciji zewšym?
Maśo Wy zajm na temje digitalizacije - pón źiśo na tu konferencu. A to jo teke zajmne - njemusyśo něnt wótcakaś suche pśednoski a słaby kafej - wuraznje źo tym akteram wó to, z Wami do rozgrona pśiś, se wuměniś a wósebnje wuproběrowaś. To móžośo źinsa wótpołdnja na interaktiwnej wustajeńcy serbskich digitalnych produktow wót napoł šesćich do wósymich wjacor (17:30 - 20:00) w załožaŕskem centrumje "Startblock B2" Techniskeje uniwersity BTU how w měsće. Witśe źo dalej z konferencu. Ceły program pód www.serbski-institut.de.