Njetrajo wěcej dłujko, pón su teke w Bramborskej prozniny. Pśiducy tyźeń stwórtk se zachopiju, lětosa pó dłujkem casu zasej raz pózdźej ako w zajźonych lětach. Ze zachopjeńkom prozninow co město Chóśebuz se staraś wó reparatury a saněrowanje wšakich šulow. Za to jo zaplanowało wěcej ako 200.000 euro. K tym šulam słušaju mjazy drugim Erich-Kästnerowa zakładna šula w Chmjelowje blisko Kauflanda, Carl-Blechenowa zakładna šula w centrumje, Regine-Hildebrandtowa zakładna šula w Knorawje a zakładna šula "Lutki" w Žylowje. Saněrowanje fasady, mólaŕske źěła a mjeńše reparatury stoje how na planje.
W Dolnoserbskem gymnaziju kśě mjazy drugim reparěrowaś kšywo sportoweje hale a w awli wuporěźeś parket. Město teke informěrujo, až mógu se źěła dliś do nowego šulskego lěta, gaž njenamakaju firmy abo gaž pśiźo material pśepózdźe. Docełego ma město w swójom planje dwa miliona za běžne wobgóspodarjenje šulow.
+++
Kóńc šule a prozniny gronje teke familijowy dowol - abo za skóro dorosćonych snaź dowol bźeze starjejšych. Ale co jo, gaž njejsu familije zamóžne, dowol zapłaśiś? Gaž słušaju k tym socialno-słabym familijam w kraju? Za ten pad pódpěrujo bramborski familijowy ministerium, ako smy zgónili. Familije mógu dostaś za kuždy cłonk na źeń 10 euro ako pśidank za pśenocowanje, to płaśi wót dwa dnja až do 13 dnjow trajucy dowol. Familijowy ministerium ma teke lisćinu z adresami pó cełej Nimskej, źož góźi se dowol za cełu familiju. Wše informacije a formulary su pla krajnego amta za socialne a zastaranje LASV, telefonowe cysło serwisowego centera jo (0355)/2893 800.