8. decembra pśed 5 lětami jo wumrěł Měto Pernak z Barlinja. W pódwjacornem Barlinju jo z mamu žywy był, studěrował a ako ceptaŕ a studijny raźc źěłał, swóju familiju załožył ze žeńskeju a dwěma synoma. W lichem źělu Barlinja, což jo wěcej wótpowědowało wólnje myslecemu Pernakoju, ako smy my młodše jen pó politiskem pśewrośe wopóznali. Pśeto Barlinaŕ jo był dla wobstojnosćow togo casa pó wójnje. We wutšobje a z myslami a z myslenim jo był cas swójogo žywjenja Łužycanaŕ a dolny Serb.
Wjelebócnje jo se za swój lud tam a tudy angažěrował ako literat, publicist, pśestajaŕ, slěźaŕ, rěcny wobradowaŕ, kśesćijan a organizator serbskego žywjenja ako pśedsedaŕ Maśice Serbskeje. Za wšo to jo był w lěśe 2009 pócesćony z nejwušym serbskim wuznamjenjenim: z Mytom Ćiśinskego. Madlena Norbergowa dopominajo na wjelese aktiwity Měta Pernaka za rěcne derbstwo dolnych Serbow.:
zuk Madlena Norbergowa
Měto Pernak jo dalej aktiwny cłonk był w dolnoserbskej rěcnej komisiji, w spěchowańskem towaristwje za serbsku rěc w cerkwi a pomnikoweje kupki župy Dolna Łužyca.