Ga sćo slědny raz cołnowali pśez Błota? Sćo wěźeli, až sćo cołnowali praktiski we imaterielnem derbstwje? Twarjenje cołna jo UNESCO derbstwo a aby wóno měło pśichod, wótměju se tuchylu wósebne źěłaŕnje. Źinsa buźo južo druga źěłaŕnja a to wót zeger 16.00 w Tšupcu w trajdowem skłaźe. Tenraz kśě powědaś wó inowacijach pśi twarjenju cołna a wó trajnosć. Wěcej informacijow a pśizjawjenje pód www.spreewaldverein.de.
***
Bramborska a wósebnje Łužyca se nam zdajotej ako wósebnje mystiskej a tšašnej městnje. Toś ten zaśišć móžoš dostaś, dokulaž dajo pśecej wěcej krimijow, kenž su how ze swójim jadnanim zaměstnjone. Myslimy jano na cełu seriju błośańskich krimijow, na krimije serije Polizeiruf z Frankobroda nad Odru abo na kriminalny film ze Złego Komorowa. Znata jo awtorka kriminalnych knigłow Franziska Steinhauer. Jadnanja jeje knigłow su w Bramborskej zaměstnjone, teke w knigłach "Das Café, der Wald und der Tod". Z toś tych knigłow cyta awtoŕka źinsa we wokrejsnej bibliotejce wokrejsa Sprjewja-Nysa, w kulturnem groźe w Grodku. Cytanje se zachopijo wjacor zeger 19.00.
***
Južo slědny tyźeń smy spominali na wše te wažne tšojenja pśecej w nowembrje, kótarež su stawizny w Nimskej a Europje pśeměnili. Nejwěcej tych historiskich tšojenjow jo było dnja 9. nowembra: wótstupjenje slědnego nimskego kejžora, progroma noc na škódu a k znicenju Žydow a jich kultury a padnjenje barlińskeje murje, což jo zazwóniło nimsku jadnotu. Bramborske awtory kažu dla togo witśe na cytanje do Serbskego domu w Chóśebuzu. Wót zeger 18.00 cytaju z knigłow a drugich twórbow a protokolow.
***
Woblubowana serbska arija z titelom "Serbam" bazěrujo na basnju wót Fryca Rochy, něgajšnego ceptaŕja, awtora, ludowego basnikarja a za wěsty cas redaktora Casnika ze Šejnejdy. Serbski komponist Detlef Kobjela, z Rogozna póchadajucy, jo za Dolnych Serbow komponěrował "Wěnc serbskich arijow"; zgromadnje ze zjadnośonymi dolnoserbskimi chorami jo twórbu nazwucował a na młogich městnach z chórami wustupował. Pśed krotkim jo był wopomnjeńki koncert w spomnjeśu na Kobjelu w Hochozy. Ten koncert smy ze studijoweju techniku nagrawali a prědny źěl słyšyśo njeźelu wót zeger 13.00 w našom programje. Drugi źěl wusćełamy pón pśiducu njeźelu.