Stwórty adwent lažy pśed nami a to groni, my mamy móžnosć, se slědk śěgnuś a slědne měrne wokognuśe pśed gódownymi swěźenjami póžywaś abo: my se z połneju paru do slědnych pśigótowanjow walamy a smy kóńc tyźenja hyšći raz pla wšych adwentnych koncertow, filmowych wjacorow a gódownych markow pódla. How su někotare naraźenja za Was:
We Grodku maju žywego adwentnego kalendarja. W ramiku togo pśepšosujo źinsa Serbski kolektiwny berow w Badergasse 15 a wótwórijo swóje žurja: pokazuju serbski gódowny film režiserki Angele Šusteroweje z titelom "Z njebes wyšin". Zachopjeńk jo zeger 16.00. Filmaŕka buźo pśibytna a wulicujo wó nastaśu filma.
***
W Chóśebuzu jo źinsa a witśe slědna šansa se w wuměłstwowej hali Łužyca pśi Pisanem dwórnišću na wuměłstwowu drogu pódaś. Aktualna wustajeńca ma titel "Wuměłstwowe drogowanje pśez Łužycu". Kurator Siegfried Kohlschmidt jo wubrał teke serbske motiwy a teke wót serbskego mólarja Fryca Lattkego su wobraze zastupjone.
***
W Lubinje w cerkwi Paula Gerhardta wustupiju źinsa zeger 17.00 wukniki muzikoweje šule z gódownym koncertom. Stare a nowe gódowne spiwy w swěźeńskej dekorěrowanej cerkwi. Zlubjone jo Wam musikaliske sańkowanje pśez wšakorake muzikowe stily a epochy. Teke śopłe piša a adwentne słodkosći su garantěrowane. Zastup jo dermo.
***
W žylojskej cerkwi prezentěruju źinsa wjacor zeger 18.00 wósebne žłobikowe graśe. Oberuferer Christgeburtsspiel se tomu groni: pó srjejźowěkowem nałogu a ze stareju rěcu a pówažnymi spiwanjami pśepšosyjo to graśe na rozmyslowanje. Wšykne zajmce su pśepšosone, zastup jo dermo ale wó dary se wjasele.
***
Teke źinsa wjacor wót zeger 19.00 jo w Baršću adwentny koncert z kupku "Gregorian Voices". W cerkwi swětego Mikławša zazneju dłymoke basy a wusoke spiwańske wuměłstwo. Gregorianiske spiwanje ku gódam.
***
Sami spiwaś dejśo źinsa w Bórkowach a to serbske gódowne spiwy a kjarliže. William Janhoefer, zagronite za to serbske w amśe, pśepšosyjo na serbsku zgromadnosć w adwenśe, spiwanje, warjone wino a placki a to pśi domje Annemarie Schulzoweje. Zeger 18.00 źo los, muzikaliske pśewóźowanje pśewzejotej Ester a Almut Budyšinojc.
***
Sami rejowaś móžośo witśe w Dešnje. Muzikowa kupka "Serbska reja" swěśi swójo juž 10. lěto wobstaśa. W gósćeńcu "Serbski dwór" w Dešnje dajo togodla wót wjacor 19.00 pšawu reju z live muziku wót jubilarow samych. Wósebny highlight witśe wjacor buźo zawěsće pśedstajenje nowego albuma kupki pśi góźbje jubileja.
***
W Rownem na Njepilic dwórje jo sobotu mały gódowny mark. Rowniske dźěćetko pśiźo woglědat a kuždy, kenž mark woglědujo, móžo se swětło měra z Betlehema sobu domoj wześ. Pó změrkanju zeger 17.00 źo los.
***
Njeźelu su wšuźi namše na stwórty adwent.
***
Za wšych, ak njamaju hyšći dosć wót gódownych markow, dajo na Jakubcowem groźe w Mortkach wósebne wiki na groźe. Wót 10.00 do 19.00 wjacor su wrota groda wótwórjone za małych a wjelikich woglědarjow.
***
W Janšojcach jo njeźelu wjacor na farskem dwórje tradicionelny adwentny koncert Janšojskich dujaŕskich muzikarjow. We swětle wupyšnjonego dwóra cakatej warjone wino a pśedgódowna atmosfera na woglědarjow. Rownocasnje jo Janšojski Bog we jsy ducy a woglědujo źiśam doma.
***
Žycymy Wam śichy a pótajmnosći połne slědne dny pśed gódami a pótom wjele wjasela z lubymi pśijaśelami a pśiswójźbnymi ku gódam!