13.12.2024 - Kulturne pórucenja za kóńc tyźenja / Sorbische Wochenend-Kulturtipps
Tych koncertow dajo dosć a nadosć teke tśeśi adwent:
Dwa koncerta buźotej w gołkojskej gmejnje. Kosobuski chor spiwa sobotu w głažanej cerkwi w Glinsku, wótpołdnja zeger tśich (15.00).
Njeźelu wustupijo gołkojskej ludowy chor wótpołdnja zeger pěśich (17.00) we wejsnej cerkwi.
Dalšny adwenty koncert buźo w žylojskej cerkwi. Muziku studěrujuce chóśebuskeje uniwersity prezentěruju twórby Bacha, Händela, Glucka, Brahmsa a drugich, witśe wjacor zeger šesćich (18.00).
Do togo - wót zeger tśich wótpołdnja (15.00) - kažo žylojske wejsne towaristwo na adwenty pśechojźowanje pó jsy a kołowokoło jsy ze wšakimi zajmnymi stacijami a pśechwatankami.
***
Gódowne buźo groźišćo w Beeskowje. Witśe wótpołdnja wót napoł tśich (14.30) wótwórijo bajkowa śpa w piwnicnej wjelbje swóje źurja. W zalu zachopijo se zeger tśich (15.00) koncert a na dwórje groźišća staraju se gódowne krotuški wó wšake wuběźowanja a gódownu zaběru. Gódownicka na groźišću w Beeskowje buźo witśe až do zeger sedymich wjacor (19.00).
***
Historiske grajki ako pupkowe wózyki a pupkowe śpicki, pśekupcownje a z cymž su naše starke a starjejše grali – to jo wustajone lětosa ku gódam w domowniskem muzeju w Dešnje. Wótcynjony jo muzej wót wałtory do stwórtka wót dopołdnja źaseśich až do wótpołdnja tśich (10.00 - 15.00) a na njeźelach a swěźenjach wót zeger dweju do styrich wótpołdnja (14.00 - 16.00).
***
Wóń gódownych plackow a warjonego wina, wulicowańka pód drebomom, wupyšnjone niske śpy z městnami za zgromadne baslenje – to wšykno caka witśe na błośańskich burskich dwórach w Bórkowach, w casu wót zeger dweju wótpołdnja až do wjacora wósymich (14.00 - 20.00).
***
Źiwadłowe graśe za źiśi wót tśich lět pśedstajijo figurowe źiwadło ze Sakskeje w Serbskem kulturnem centrumje w Slěpem. Głownu rolu grajo mały pinguin, pśedstajenje se zachopijo njeźelu wótpołdnja zeger tśich (15.00).
***
Łužyska namša njeźelu buźo w chóśebuskej nimskej cerkwi dopołdnja zeger źaseśich (10.00).
***
Gódowne wiki z muziku a programami na jawišću, kreatiwneju zaběru a drugimu pśechwatankami budu njeźelu w Grodku, wót zeger tśich wótpołdnja (15.00) w kulturnem groźe.
Lětna zgromaźina w Janšojcach / Hauptversammlung Domowina Ortsgruppe Jänschwalde
Sobotu buźo w Janšojcach głowna lětna zgromaźina janšojskeje domowinskeje kupki - we wjelikem ramiku: W gósćeńcu "K lipje" wustupujotej wjacor zeger šesćich (18.00) nejpjerwjej janšojskej chora, pótom wobraduju Domowinarje a glědaju na pśedewześa pśiducego lěta. Na pśikład jo 3. januara zasej ta wjelika woklapnica za cełu wjas planowana a źeń pótom, 4. januara, startuju do fašingowego casa z balom larbow.
Wustajeńca/Ausstellung: Elisabeth Wolf
Elisabeth Wolf - jeje mě jo w Chóśebuzu źinsa hyšći we wšych gubach, dokulaž dłujcka droga we Žandowje z wjele bydleńskimi domami nosy jeje mě. Ale chto znajo wobrazy prědneje Chóśebuskeje mólaŕki? Elisabeth Wolf jo se w Žandowje naroźiła 1873 a we tom casu hysći njesu směli žeńske wuměłstwo studěrowaś. Wóna jo se weto wukubłaś dała, mjazy drugim we Barlinju a jo jadna wót mało ženskich we tom casu, ak su mógali wót wuměłstwa žywe byś. Slědna wustajeńca z jeje twórbami jo była pśed 30 lětami. Togodla měsćański muzeum jej pósćijo něnto wobšyrnu retrospektiwu, wót togo tyźenja jo wustajeńca wótwórjona a tam njesu jano impresije města wiźeś abo śichowobraze a kreslenja. Elisabeth Wolf jo teke młoge Serbowki w narodnej drastwje mólowała, mjenja portretěrowanych pak cesto njesu wěcej znate.
Chtož jo něnt narske na jeje wobraze: na Dwórnišćowej droze w měsćańskem muzeju su wóni wustajone, až do apryla pśiducego lěta.