Gnujucy wid na Serbow – dokumentacija “Pla nas gronje jej Hanka” wót Grit Lemke běžy pětk zeger 19:30 w Kalawje. Pśepšosyjo tamna cerkwina wósada pódla měsćańskeje cerkwje. Zastup płaśi 3 do 5 euro.
***
Serbski blues, Elektro, Punkrock a Folk – źinsa startujo Witaj-festiwal w górnołužyskich Miłočicach (Miltitz). Pśed kulisu atmosferiskeje skały sćo pśepšosone nic jano na dobre koncerty, ale teke na serbske filmy, wuměłske źěłaŕnja a diskusije. Źo wó pśichod serbskego wuměłstwa, wó módrośišć a serbske utopije. Źinsa wjacor zeger 18.00 źo los. Kórtki za pětk płaśe 12 euro, za sobotu 15 euro, za ceły festiwal 20 euro. Wěcej na: witajfestiwal.wordpress.com.
***
Škórbiny gluku pśinjasu – za tych, ak‘ su kśěli tak abo tak raz nowe taski a talarje se wobstaraś a zawěsće jo to pón teke gluka za gjarncarja. W Bórkowach budu sobotu 21. gjarncaŕske wiki – wót funkcionalneje wóry až k wuměłstwoju, wšo jo pódla. Su Wam jadnorazne unikaty lubjej ako masowa wóra – witśe wót zeger 10.00 do 18.00 na swěśenišću w Bórkowach to wšo dajo. Zastup płaśi 1 euro.
***
Rědne drastwy, dujaŕska muzika a rejtarje na wusokich kónjach: Kokotowa sezona startujo ten kóńc tyźenja. Witśe móžośo jen dožywiś w Barbuce wót zeger 14.00. Njeźelu źo pón dalej w Bórkowach, tam zmakaju se zeger 14.00 na łuce w Kupaŕskich Bórkowach.
W Hažowje buźo ned wejsny swěźeń ten startujo juž źinsa wótpołdnja ze sportom, witśe z pyšnym programom a ze 26. gólnem běgu ned zajtša zeger 9.00. Njeźelu pón žednog kokota łapaju, ale gjarnca zabijaju – zeger 14.00 we jsy. Do togo zabijaju źiśi plyšowy kokot. To buźo njeźelu wóžywjenje kokotowege nałoga w Hažowje.
***
Žnjowny cas jo a w Błotach zasej stogi kładu. W Starej Niwje cynje z togo ned rědny wejsny swěźeń. Sobotu pśi wustawadlišću wót zeger 13.00. Za dobru bursku jězu a piśe jo starane. Na Was se wjaseli tradiciske towaristwo w Starej Niwje.
***
Apropos sport – taku pšawu paleńcowu licbu ma sportowe towaristwo w Hochozy – 111 lět. A to swěśe wót pětka ceły kóńc tyźenja z programom za cełu familiju. Samo z helikopterom móžośo jězdźiś. Zastup jo dermotnje.
***
Chtož pyta za rědnym hobbyjom, abo co wobnowiś swóje znajobnosći: Serbski wušywaś móžośo w Dolnoserbskej kulturnej akademiji. Njeźelu startujo nowy kurs we wejsańskem domje w Gołbinje wjacor wót zeger 19:00 do 21:00. Dalšne terminy budu srjodu, 31. julija, a tśi terminy w awgusće. 5 euro to płaśi na wjacor. Pśizjawśo se z mejlku na astrid-schramm@dompro-nl.de.