Orgelowy koncert buźo źinsa wjacor zeger sedymich (19:00) w Serbskej cerkwi w Chóśebuzu. Zaznějo muzika ze styrich stolěśow a teke improwizacije. Na orgelach grajo Paolo Oreni z italskego města Milano/Mailand. Kórtki płaśe 7 euro, źiśi až do 14 lět njemuse zastup płaśiś.
***
Chóśebuske małe źiwadło Theaternative C w Peterzilijowej droze w Chóśebuzu kažo źinsa na premjeru lěśojskego źiwadła. Premjeru změjo komedija Williama Shakespeara "Wie es euch gefällt". Zachopjeńk jo wjacor zeger wósymich (20:00), kórtki su na pśedań pśez internet pód adresu info@theaternative-cottbus.de.
***
Ewangelska cełkowna wósada Sprjewja-Małksowa Dolina pśepšosyjo wšych wěriwych zasej na lěśojsku cerkwinsku rallye. Kuždy pětk zmakaju se wše, ako to kśě, w drugej jsy na zgromadne spódobne wjacory z bjatowanim, piśim a jězu. Źinsajšna stacija jo cerkwja w Tśěšojcach (Groß Schacksdorf), zachopjeńk jo wjacor zeger napoł sedymich (18:30.
***
Graśa a wjasoły ruš cakaju na gósći swěźenja na pśibrjoze gólańskego jazora w Dźěwinje blisko Slěpego. Na ten swěźeń kažu dźěwińska wognjowa wobora a wšykne druge towaristwa we jsy. Swěźeń zachopijo se witśe wótpołdnja zeger dweju (14:00). Wjacor buźo na pśibrjoze diskoteka.
***
Wót źinsajšnego až do njeźele buźo w Lubnjowje a na Lědach tradicionelny błośański swěźeń. Mimo cołnowanjow dopórucyju towaristwa a kulturne kupki z regiona kulturu. Pódla budu mjazy drugim šwikałkarje z Lubnjowa a teke serbske towaristwo "rubiško". Jogo cłonki prezentěruju drastwy a nałogi a authentisku kulturu swójich serbskich prědownikow. Wjerašk swěźenja buźo njeźelu tradicionelne cołnowe korso. Dla 50. jubileja swěźenja buźo lětosa tam 50 wupyšnjonych cołnow, kuždy ze swójskeju tematiku. Cołnowe korso startujo njeźelu wótpołdnja zeger tśich (15:00) wót wjelikego wustawadlišća w Lubnjowje, zeger styrich (16:00) budu pón na Lědach.