Gaž Łakoma słyšymy, myslimy na protesty, na wójowanja pśeśiwo wudobawanjeju brunice we Łužycy. 15 lět pó slědnych protestach zmakaju se něgajšne aktiwisty zasej a pšasaju, co jo wóstało? Co groni pśisud Łakomeje nam źinsa? Jo to tema noweje dokumentacije "Lacoma - der Kohle im Weg" chóśebuskeje Wobswětoweje kupki. Film jo chronika togo protesta wót casa NDR až k znicenjeju jsy w lěśe 2007. Źinsa wjacor 19.30 buźo filmowa premjera w Gladhousu w Chóśebuzu. Njeźelu słyšyśo pla nas wusćelanje ku tej temje: Z głownym iniciatorom filma, z Renejom Šusterom wót wobswětoweje kupki jo se rozgranjał Gregor Kliem.
***
"Poezija pśirody" jo titel noweje wósebneje wustajeńce z twórbami wót Christiny Grätzojc w Serbskem muzeju w Chóśebuzu. Źinsa wótpołdnja zeger 17:00 se wustajeńca Łužycanaŕki wótwórijo, kótaraž jo mógła w swójich twórbach wuměłstwo dweju kontinentowu zwězaś. Jeje twórby zwězuju wuměłstwo awstralskich Aboridźinow z tym serbskich ludowych wuměłcow. Co to wóznamjenijo, gaž domownju zgubijoš, teke to wuměłcowka we swójich twórbach tematizěrujo. Łužycanaŕka jo swóju rodnu wjas zgubiła, ako teke praludy we Awstralskej. Inspirěrujuce wuměłske twóŕby Christiny Grätzojc su w Serbskem muzeju až do 21. septembra wiźeś. We tom casu mógu se woglědarje teke na mejstaŕskich kursach a podiumowych diskusijach wobźěliś, na kótarychž se wuměłcowka wobźělijo. Program namakajośo na webstronje Serbskego muzeja. Dokulaž jo se za wernisažu źinsa južo wjele woglědarjow pśizjawiło, póbitujo muzej witśe wótpołdnja zeger 15:00 dalšnu móžnosć z wuměłcowku do rozgrona pśiś.
***
Hyšći jadno zarědowanje witśe wótpołdnja w Serbskem muzeju buźo južo zeger 14:00: wjeźenje w ukrainskej rěcy. To prědne take wjeźenje gano jo było take wuspěšne, až žyce sebje dalšne.
***
Mrozowate njedeje pśiduce nocy wěcej byś, pótakem jo teke cołnowanje jadna zajmna opcija. Take buźo witśe w Tšupcu, wjacor wót zeger 18:30 až do 20:00 góź. Tšupcański groba von Houwald pokazujo wódowy park w Tšupcu a pśi tom pśedstajijo tak młogu błośańsku powěsćowu póstawu.
***
Lubowaŕje bajkow pśidu witśe na swóje kosty. Źiwadło Machandel z Barlinja wustupijo dwa raza, dopołdnja w Strjažowje, wótpołdnja w Dešnje. Za źiśi wót 5 lět prezentěrujo bajku wó wuwjadlonem domcyku chódoty Baba Jaga. W Strjažowje buźo pśedstajenje w Starej šuli witśe w 11:00 góź., w Dešnje w 15:00 góź. w domowniskem muzeju.
***
W Dešnje w tamnem domowniskem muzeju stoj lětosna jatšowna wustajeńca pód motom "Wogeń, wóda a pyšne jaja". Wustajeńca pśiwobrośijo se twórjenjeju Helmuta Kurja, kenž by lětosa wóswěśił swój 90. narodny źeń. Bernd Pittkunings wobrubijo wótwórjenje muzikaliski. Wótwórjenje buźo njeźelu.
***
Druga jatšowna wustajeńca wótwórijo se njeźelu w Serbskej tkajaŕskej śpě w Drjowku. "Sorbisch bunt/serbski pisany" jo titel tamneje jatšowneje ekspozicije. Drjowkojski muzej jo wótwórjony wót wałtory do njeźele wót 13:00 až do 17:00 góź.
***
Jatšy se bliže z wjelikimi kšacami – tak buźo cas, až zapusty se zakóńcyju. Slědne lětosne zapusty budu witśe w Radowizy a Rogowje a muskecy zapust w Žylowje.
***
Pśedjatšowny cas jo teke cas jatšownych wikow. Ten kóńc tyźenja budu take w Błotach, w Lubnjowje w błośańskem muzeju. Wobej dnja – sobotu a njeźelu – su jatšowne wiki pśistupne wót 10:00 do 17:00 góź.