Drogowańska wustajeńca wó mjeńšynach w Nimskej z titelom „Was heisst hier Minderheit“, ako jo se 2022 w Nimskem zwězkowem sejmje wótwóriła, jo južo w někótarych nimskich městach dobry wótgłos namakała. Źinsa wjacor zeger 18.00 wóna se wótwórijo w radnicy w měsće Bad Vilbel w Hesseńskej. Wěcej informacijow, mjazy drugim k wótpowědnym temam wustajeńce dostanjośo how.

*****

Wažny źeń w nimskej historiji jo 9. nowember: 1918 jo był kóńc monarchije, kejžor Wilhelm II. jo wótstupił a wuwołali su republiku; 20 lět pózdźej – 1938 – jo była w nimskem rajchu progromowa noc, nacije su znicyli synogogi a su wusmjerśili a katowali wjele žydow; a nic naslědku jo 9.ego nowembra 1989 padnuła Barlińska murja a zachopił jo se proces zasejzjadnośenja Nimskeje. Na toś te dny spominaju wšuźi we tych dnjach.
W Grodku buźo pśi tej góźbje witśe dopołdnja zeger 10.00 spomnjeńske zarědowanje na wikach. Połdnju zeger 12.00 pókazuju w Sprjewinem kinje dwa dokumentarnej filma wó casu pśewrośenja a wótpołdnja zeger 17.00 pśedcytaju mjena a biografije žydojskich luźi z Grodka, zasej na marku.

*****

Sobotu spominaju na woporow koncentraciskego lěgwa w Jemjelnicy pla Luboraza. Połdnju zeger 13.00 buźo spomnjeńska namša w luboraskej cerkwi, wótpołdnja 14.30 zachopijo se zarědowanje na dwórnišću w Jemjelnicy pód titelom “stigmatizěrowanje tencas a źinsa”. Frank Nonnenmacher prezentěrujo pód toś tom titelom swóje knigły, wón jo pótomnik jadnogo wopora w tom lěgwje.

*****

W Tšupcu zarěduju witśe (sobotu) źěłarnju pśichoda, źož su wše generacije pśepšosone na dialog, kak mógu za gmejnu lěpjej gromadu źěłaś a projekty na dobro jsy zgromadnje realizěrowaś. Źěłarnja w Tšupcu zachopijo se zeger 9.00 zajtša w zmakanišću TTK.

*****

“Serbske powěsći, bajki a mythy – casowe drogowanje pśez Łužycu” jo titel zarědowanja witśe (sobotu) w kulturnem domje “trajdowy skład” w Tšupcu. Kulturna sonina alias Marion Kwicojc wugótujo wót zeger 14.00 wótpołdnja zajmny program a muzicěrujo ze swójeju kupku na starych instrumentach.