105 cłonkow - tak wjele ma tuchylu wědomnostna towarišnosć Maćica Serbska. To jo stabilne wuwiśe, groni k tomu pśedsedaŕka Maćice dr. Anja Pohončowa. Tu sobotu zmakajo se Maćica Serbska na swójej głownej zgromaźinje. W rozpšawach a diskusijach buźo teke wó to grono, kak co se Maćica w pśichoźe nastajaś glědajucy na nowu generaciju, kak ju pśiwabiś. Wědomnostny input dostanu w pśednosku k městnym mjenjam w Dolnej Łužycy. Pśepšosony jo dr. Kito Kśižank ze Serbskego instituta. Zmakanje buźo sobotu zeger 14.00 w budyšyńskem Serbskem muzeju.
+++
Ta EUROPEADA - Balokopaŕski turněr europskich narodnych mjeńšynow - dej se we wšakich facetach změniś. Pó nazgónjenjach slědnego wudaśa we Flensburgu deje w pśichoźe mustwa móc se zasej wěcej zmakaś a do kontakta pśiś. K tomu słuša, až njedejali grajne městna byś pśedaloko zdalone. To jo rozsuźiła ekspertowa kupka pśi FUEN w měrcu. Kaž MDR k wěsći dajo, pódpěrajo to teke wjednik serbskeje delegacije Clemens Škoda wót Domowiny. Nowo dej byś tek, až móžo kužda mjeńšyna sobu wześ sudnikow. Pśichodna Europeada buźo 2028 w połnocnej Italskej blisko słowjeńskeje granice.
+++
Projekt Zorja jo źinsa tema w Estniskej. Na tamnej nejwětšej estniskej uniwerziśe w měsće Tartu na fakulśe za linguistiku powěda Zorja-Koordinator Maks Hasacki wó spócetkach a wó wuwiśu rěcnego projekta. Pśepšosony jo wót tamnego filologa Axela Jagaua, ak teke wó Serbach jo slěźił. Teke w Estniskej dajo wšake mjeńšynowe awtochtone rěcy ale njedajo hyšći žeden pódobny program kaž Zorja. Hasacki buźo online pśišaltowany. Slědowaś móžośo pśinoskoju źinsa wótpołdnja zeger 15.00. Link: uniwersita Tartu