W Chóśebuzu maju wjeliki problem w šulstwje. Pśecej wěcej źiśi co chójźiś na gymnazium, bóžko njejo tuchylu dosć městna na gymnaziumach w měsće. Togodla su se w měsćańskej radnicy rozsuźili wutwóriś na gymnaziach pśidatne rědownje. Do togo dej byś wót nowego lěta zapśěgnjony Dolnoserbski gymnazium, pak nic za dlejšy cas, ale jano za maksimalnje dwě šulskej lěśi. W slědnych tyźenjach jo se wjele wó tom diskutěrowało w měsćańskich a serbskich gremijach. Wósebnje ze serbskego boka su pśišli mócne protesty. Teke w Serbskej raźe su diskutěrowali. Srjodu su se w měsćańskem parlamenśe z tym zaběrali. Su ga kśěli to wobzamknuś. Teke tam su dłujke a źiwe diskusije byli, frakcija AfD ze swójimi 14 cłonkami ga jo pominała, až Dolnoserbski gymnazium njesmějo pśiwześ pśidatnych wuknikow, wósebnje Ulrich Wünsch, skótny gójc z Rogozna a zubnjy gójc Georg Simonek, pśedsedaŕ frakcije AfD stej mócnje wustupowałej za Dolnoserbski gymnazium. Wobej stej raz na serbskej šuli abitur gótowałej. To jo šula z wósebnym profilom a ma wjeliki nadawk wukubłaś dorost za serbske žywjenje, stej groniłej. Pódšmarnułej stej, gaž pśidu na šulu hyšći dalšne wuknice a wukniki, ako njamaju serbske kórjenje a serbski hyšći wuknuli njejsu, jo to na škodu šule.
To wšo pak njejo pomagało, teke to nic, až su naraźili, až se měsćański parlament hyšći raz z teju tematiku zaběrajo. Wětšy źěl pśibytnych cłonkow měsćańskeje zgromaźiny su za to głosowali. Jano cłoni AfD a Maja Wallstein wót SPD su byli pśeśiwo tomu, až se na DSG wót septembra pśiducego lěta wutwórijo pśidatna rědowanja.