Literariske zjadnośeństwo PEN - pen stoj za Poety, Essayisty, Novelisty - se zasajźujo na cełem swěśe we wjele krajach za lichotu słowa, za liche wuwiśe literatury a spěchowanje wósebnje małych, mjeńšynowych literaturow a rěcow. W medijach se PEN pśecej zasej zasajźujo za pomoc inhaftěrowanych abo pódtłocowanych spisowaśelow. Teke w Nimskej dajo PEN. Nimski PEN ma wótněnta nowu wótnožku. Załožyła jo se tak pomjenjona Gruppe Leipzig. Wóna co zwězaś awtorki a awtorow wósebnje z pódzajtšneje Nimskeje. Jeje prědny powědaŕ jo jaden Serb - spisowaśel a žurnalist Benedikt Dyrlich. Kupka Gruppe Leipzig co se zasajźowaś za to liche słowo w pódzajtšnej a teke serbskej literaturje.