Stwórtk su serbšćinarje a serbšćinaŕki zakładnych šulow Dolneje Łužyce dožywili na Dolnoserbskem gymnaziju wósebny wjerašk. Na iniciatiwu gymnazialnych ceptaŕkow a z pódpěru Serbskego šulskeo towaristwa a wjednistwa šule su tam pśewjadli prědnu olympiadu dolnoserbskeje rěcy za stwórty lětnik.
Pód motom “Nazyma jo kšasna” su na styrich stacijach dopokazali swóje rěcne zamóžnosći. Połdnjo su wuknice a wukniki gymnazija pśigótowali za nich wšake zaběry, mjazy drugim karowanje žabow, abo spiwnu a rejowańsku źěłaŕnicku.
Pó wobjeźe su se pócesćili tśi prědne dobyśarje a dobyśaŕki. Prědne myto Witaj wucby jo dostała Charlotte Möllerojc z Tšupcańskeje šule, dobyśaŕka mjazy serbšćinarjami B-wucby jo była Maja Bläschojc z Brjazyńskeje šule.
Aby se źowća a gólcy mógali derje zastaraś jo zarědowanje financielnje pódpěrała Załožba za serbski lud.