Napněty źeń cora w Dešnje. Pó sedym góźinach jo było skóńcnje jasne. Wšykne głose pśi wuzwólowanju Rady za nastupnosći Serbow w Bramborskej su se dowulicyli. Wólbna wjednica Margit Neugebauerowa jo była zawěsće wólažćona pó mjasece dłujkem napinanju. Pśecej zasej jo wólbny wuběŕk nagranjał luźi se ako wólaŕka a wólaŕ registrěrowaś daś. A pón ta ceła procedura pśigótow a rozpósłanja wólbnych listow. Pśi tej góźbje se wóna teke wuźěkujo pla wšyknych pomocnikow. Něnt jo pak jasne. Do noweje rady su se wuzwólili: Markus Kóńcaŕ, Delia Münchowa, Dieter Freihoff, Měto Nowak a Michael Apel.
Z wótstawkom stej dostałej jadnaŕ Domowiny Markus Kóńcaŕ a drastwina šlodaŕka Delia Münchowa nejwěcej głosow. Na njej padnjo 687 a 675 głosow. Wetom až Delia Münchowa a šołta gmejny Markojska góla Dieter Freihoff juž amtěrujucej raźe pśisłušatej, stej teke Markus Kóńcaŕ a wědomnostnik Měto Nowak južo raz w raźe byli. Jano choreograf a jadnaŕ Michael Apel jo nowack. Dogromady jo se 10 kandidatkow a kandidatow nastajiło. W cełku jo 1060 wólaŕkow a wólarjow w Bramborskej swój głos wótedało. To jo wjele wěcej ako pśi slědnych wólbach, ale nic tak wjele ako pśi prědnych demokratiskich wólbach Serbskeje rady w lěśe 2014. Tegdy jo wokoło 1.250 luźi se wobźěliło.
Hyšći njejo nowa rada w amśe. Konstituěrowanje rady lažy w zagronitosći prezidentki krajnego sejma w Bramborskej. To se stanjo za wšym zdaśim akle w nowem lěśe.