Co cyniś ten kóńc tyźenja: na toś to pšašanje njedajo ten tyźeń lažke wótegrono, dokulaž wšuźi w regionje jo něco los. Ale glědamy teke hyšći na źinsa:
Wšykne lubowaŕje serbskich drastwow cakaju zawěsće juž napnjete: zeger tśich (15:00) se w Serbskem muzeju w Chóśebuzu wótwórijo prědny tšanterowy mark za serbske drastwy. Až do zeger 18:00 móžośo tam za wułapotkami pyskaś.
***
Cerkwina wósada z Baršću pśiźo źinsa wjacor zasej gromadu pśi Sommerkirchenralleye, tenraz zwenka wósadnego wobceŕka w Jarješku we winicy "Marbachs Wolfshügel". Wósebnje pśepšosone su k tomu wósadniki noweje wósady Sprjewiny a Małksowy doł. Pó nabóžninje zeger 18:30 zmakaju se we vinotece a wopytuju regionalne wino.
***
W Bórkowach we "zelenem rožku" sćo źinsa pśepšosone na powěsćowe cołnowanje. Na wšakorakich stacijach tury wócuśeju pśi groblach a tšugach serbske powěsćowe figury a wobgusluju Was z tšojenjami a spiwami. Pótom grajo kupka Kula Bula jadnoraznu měšańcu ze serbskich šlagrow a mjazynarodneje folklory. Městno w cołnje dejali se rezerwěrowaś pód sagenkahnfahrt.de.
***
Sobotu a njeźelu jo w Bórkowach teke wjeliki ruš - pón wabi 23. Błośański rucnikaŕski a burski mark. Móžośo rucnikarjam pśiglědowaś a jich wuźěłki ned na městnje kupiś. Pśeźěłanja lana buźo se pśepokazaś, žnjowna krona nastanjo live na marku a stog kśě teke stajiś. Se wě až teke pisany ramikowy program z tradicijami rejami a serbskimi drastwami buźo. Na wobyma dnjoma jo mark wótwórjony wót zeger 10:00 do 18:00.
***
We muzejowej brožni w Błobošojcach buźo ten kóńc tyźenja głosnje a luštnje: Kabaret "Leipziger Pfeffermühle" gastěrujo. Sobotu wjacor zeger 19.00 graju wuběr nejlěpšych scenow ze swójich programow. Kórtki płaśe we pśedpśedańku 25 euro, pśi wjacornej kasy 28 euro. Za śělne derjeměśe stara se team muzeja, zastup jo wót zeger 18.00.
***
W Gojacu zmakaju se na wejsnem naměsće ten kóńc tyźenja pśijaśele stareje techniki: wiźeś budu stare traktory, motorske a druge techniske wudobyśa.
***
Kóńc tyźenja wuklincaś daś móžośo w Nowej Niwje: W tamnej domowniskej śpje sajźijo njeźelu wót zeger 14:00 mlince, tamna drastwina kupka pśepšosyjo.