SMY pśiźo do Chóśebuza/Tanzstück des Sorbischen National-Ensembles
Pšašanja za identitu - za tym, wótkulž pśiźoš, co twój póchad z tobu cyni, pśecej zasej jo to tema. Něnto teke tema aktualnego rejowańskego graśa Serbskego ludowego ansambla. Ten pśiźo tu sobotu z produkciju "Smy! - Bin ich?" do Chóśebuza. Choreografowka Gundula Peuthert njedajo jano Serbam słowo – pśez kameru a płachtu ale teke rejowaŕkam a rejowarjam. Jo ga serbski ansamebl dawno mjazynarodny team, kenž se rozestajijo z tym co to měni "serbski byś". Pśedstajenje buźo sobotu, 5. apryla, wjacor zeger 19.00 w Piccolo źiwadle.
A how hyšći dłujkodobny termin ze SLA: Nawłos za lětom - w aprylu 2026 - planujo Serbski ludowy ansambel pśedstajenje Kocorowego "Nalěća/Nalěśa". Ten oratorium jo jaden tych nejwěcej woblubowanych serbskich klasiskich twóŕbow. Ansambel jo ga pśecej zasej był nuzowany serbske kompozicije se daś pśeměniś, cesto nowo aranžěrowaś, aby mógał ten pśez lěta pómjeńšony orchester tu serbsku literaturu zewšym na jawišćo spóraś. Něnto ceło nawopak. "Nalěćo" dej se pśedstajiś w swójom originalnem wjelikem orchestrěrowanju wót Jurija Winarja. Za to buźo se orchester ekstra pówětšyś. Pódla chora SLA su teke zasej lajske chory pšašane sobu statkowaś. Juž něnto za to te pśigóty zachopiju. Maju teke prědk někotare numery w dolnoserbskej rěcy spiwaś, jo nam gronił dramaturg pśi ansamblu Syman Hejduška. Pótakem: 26. apryla 2026 "Nalěćo" w Statnem źiwadle w Chóśebuzu.
+++
Parlament sedym jsow/Parlament der sieben Dörfer
Ten wuměłski a zrazom demokratiski projekt dej aktiwěrowaś wejsanarjow. Team wokoło profesora za wuměłstwo Reinera Matysika ze Šlazyńskeje buźo ducy w sedym jsach: 5 wokoło Chóśebuza a 2 w pólskej Łužycy. Pśecej jaden tyźeń póbywaju w jadnej jsy a pšašaju wobydlarjow, co felujo we jsy? Co mógu zgromadnje teke w krotkem casu realizěrowaś – jaden pomnik, abo lěśojski kino, wšo jo móžno, což luźi zwězujo, groni Matysik. Wót 2. maja budu ducy. Startuju w Dešnje, źož pśed faru natwarje wjelicki stan a pśepšose z Domowinu a wósadu na zgromadne grilowanje. Dalšne stacije su Strjažow, Depsk, Žylow a Brjazyna. Projekt jo spěchowany pśez strukturne srědki.
+++
Nowa wustajeńca w Błobošojcach/Neue Ausstellung in Museumsscheune Bloischdorf
Nowe wuměłstwo wisy w serbskem wejsańskem muzeju w Błobošojcach. K prědnemu razoju wustajijo tam mólaŕka Iris Generalowa z Cerska. Njeźelu jo se wustajeńca wótwóriła. Wuměłcowka pśiźo spócetnje z Nordrhein-Westfalskeje a bydli akle dwě lěśe we Łužycy. Wóna pódšmarnjo wótwórjonosć, kótaruž how dožywijo teke glědajucy rowno na lajske wuměłstwo. Generalowa mólujo pśedešym stilizěrowanu a detalěrowanu naturu a zwěrjetowe bildy. Rownocasnje jo se w Błobošojcach teke jatšowna wustajeńca wótwóriła.
+++
Noc bibliotekow/Nacht der Bibliotheken
K prědnemu razoju wobźělijo se Serbska centralna biblioteka w Budyšynje na zwězkowej nocy Bibliotekow. Pód motom "Wědu.źěliś.wótekšyś" informěrujo biblioteka wó swójom źěle. Wustajeńca jo planowana, rowno tak pśednoski a cytanja lyriki tež w dolnoserbskejj rěcy. Noc bibliotekow jo ten pětk wót zeger 18.00.
+++
Fotowa wustajeńca/Fotoausstellung in Cottbus
Nowa fotowa wustajeńca w Chóśebuzu cyni serbske žywjenje widobne. Serbske nałogi, błośańske naglědy, krajina a luźe – tśo znate fotografy Heiner Stephan, Andreas Batke a Frank Wenzel wustajiju w ramiku serbskego temowego lěta, kenž jo město Chóśebuz wuwołał za 2025. Wušej 50 twóŕbow su wiźeś wót witśego w knigłaŕni Hugendubel a na 16 dalšnych městnow na pśikład w lodach pósporomje Grodkojskeje drogi. Pśez akciju dej wěcej Chóśebuzarjow nadejś na serbsku kulturu a rěc. Wótwórjenje witśe buźo zeger 18.00 wjacor.