Europeada, europejske mejstaŕstwo narodnych mjeńšynow w balokopanju, w pódpołnocnej Nimskej a pódpołdnjowej Dańskej jo se zakóńcyła. Dobyśaŕskej mustwje stej pla muskich Friul z Italskeje a pla žeńskich Pódpołdnjowy Tirol. Finalnej graśa stej byłej cora. Dogromady jo była 5. Europeada wjelgin wuspěšna, su wugódnośili zarědowarje, kenž su byli dańska mjeńšyna w Nimska, nimska mjeńšyna w Dańskej, Sinti a Roma a ludowa kupka Frizow w Nimskej. Wobźěliło jo se 24 muskecych mustwow, 9 žeńskecych mustwow, pśisamem 900 grajaŕkow a grajaŕjow, a grali su na 14 wšakorakich sportnišćach w granicnem regionje.
+++
W slědnem graśu jo serbske mustwo muskich dobyło pśeśiwo Chorwatam z Gradišćow/Burgenland 4:2. W slědnem graśu jo dwa raza Leon Šołta z Górneje Łužyce a raz Niklas Štrawba z Picnja a raz Levi Schulze z Drjenowa do wrotow trjefił. Głowowe balo Domenika Krötela z Hochoze jo mógał chorwatski wrotaŕ wótwoboraś. Serbske mustwo trenarjowu Franka Ričela a Svena Balaka njejo mógało na swójo wuběrne wugbaśe pśed dwěma lětoma w Korutańskej nawězaś, zakóńcyjo Europeadu pak z pozitiwneju bilancu 3 dobyśow z 5 graśow a ze 17 wrotami napśeśiwo 8 napśeśiwnym trjefarjam.
Serbske žeńskece mustwo jo mjazynarodny turněr zakóńcyło na 7.e městnje, grało jo 9 žeńskecych mustwow.
+++
Jobcenter wokrejsa Sprjewja-Nysa dopórucyjo wuknikam a šulskim wótchadnikam praktikumy w prozninach. Ako jo wokrejs informěrował, njejo tuchylu skóro 300 wukubłańskich městnow wobsajźonych. Z tym su šanse wjelike, až wótchadniki hyšći za nowe wukubłańske lěto w septembrje wukubłańske městno namakaju. Te, kótarež hyšći pšawje njewěźe, za co se zewšym zajmuju, mógu w lěśojskich prozninach praktikumy w zawodach a firmach gótowaś. Tam mógu proběrowaś, źo su jich zajmy, kake zamóžnosći maju a lěc se jim w zawoźe spódoba. To płaśi za wuknice a wuknikow wót 15 lět. Informacije a pódłožki za pśizjawjenje su pód adresu w interneśe www.praktikumswoche.de/regionen/suedbrandenburg.
+++
Wokrejs Dubja-Błota a Domowina w Dolnej Łužycy pódpěrujotej serbske domowniske a tradiciske towaristwa a domowinske kupki w tom wokrejsu. Zajźony tyźeń su se zmakali w "Hanškowem domje" w Starej Niwje na wuměnu nazgónjenjow. Zagronita za serbske nastupnosći wokrejsa Dubja-Błota, Sabrina Kušyna jo pśedstajiła "směrnice wó spěchowanju serbskego luda". Wósebnje wuzwignuła jo pśi tom nowe towaristwowe spěchowanje wokrejsa. Pśedstajili su dalej "serbsku kulturnu soninu". Wóna jo fachowa móc, kótaraž jo ducy w serbskich jsach wokrejsa. Zaměr togo jo, serbsku rěc a kulturu pśez reje, spiwy, wulicowanja, graśa a tak dalej luźam zbližyś. Slědny termin za wótedaśe pšosbow za projekty w nowem lěśe jo 31. oktober.
+++
Serbska kulturna informacija LODKA pśeśěgnjo. Zawina jo wobšyrne pśetwarjenje něntejšnych rumnosćow w Serbskem domje na Awgust-Bebelowej droze 82. Dla togo wóstanjo wót pśiduceje wałtory 9. julija zacynjona. Wóna změjo pón za cas pśetwarjenja nowe rumnosći, jano por mejtarjow dalej na rožku Bebeloweje a Šileroweje drogi. Tam wita swójich gósći wót 19. julija, tak dłujko trajo pśeśěg z wšyknymi produktami a inwentarom.