Śěžke njewjedra pětk su pśinjasli rekordowe spadki do našogo regiona. Nimska wjedrowa słužba powěźijo, až na pśikład w Chóśebuzu su z jadnab 35 litrami děšća na kwadratny mejtaŕ pśetrjefili doněntejšny rekord za jaden 12. julij. Mócny děšć jo zawinował teke wjele škódow. W měsće a we wokrejsu Sprjewja-Nysa su se piwnicy a drogi pówóźili. Bomy su se pśewalili a we Łukowje, Wětošowje, Picnju a we źělach Chóśebuza jo za krotki cas milina wupadnuła. Až do wjacora jo licyła łužyska centrala za nuzowe zasajźenja jadnab 200 zasajźenjow njewjedra dla. Pśi mócnem děšću jo na awtodroze A15 šofer derił do awta wognjoweje wobory. 3 luźe su se pśi tom zranili, mjazy nimi dwa wobornika.
+++
Drogujuce ze śěgami muse źinsa kołowokoło Chóśebuza z tym licyś, až jich śěgi wupadnu. Zawina jo znješkódnjenje bomby z drugeje swětoweje wójny. Ta jo se pětk pśi twaŕskich źěłach na nowej chóśebuskej zeleznicaŕni namakała. Zdźelnje dajo hyšći narownański busowy wobchad, drogujuce deje se docasnje w interneśe abo pśez app aktualnje informěrowaś.
+++
Ceły tyźeń južo jo wobchad ze śěgami w podpołdnju Bramborskeje śěžko wobgranicowany. Pónjeźele su se pśi twaŕskich źěłach na chóśebuskem dwórnišću kable znicyli. Librowanje materiala za wupórěźenje jo se pak wokomuźiło. Nanejmenjej až do źinsajšnego wótpołdnja deje wobgranicowanja hyšći wobstaś.
+++
Wót togo tyźenja ma wokrejs Sprjewja-Nysa nowu zagronitu za serbske nastupnosći. Jo to Romy Ruffowa z Janšojc. Jeje pśedchadnica Kerstin Kosakowa jo šła na wuměńk. Wót lěta 1996 jo Kosakowa źěłała pśi wokrejsu za Serbow. Srjodu jo se rozžognowała ze sobuźěłaśerjami a partnarjami. Wósebnje chwaliło jo se jeje iniciatiwa za stwórjenje serbskego wuběrka wokrejsa. Taki gremium we drugich wokrejsach až doněnta njedajo. Ale teke hynźi jo Kosakowa serbske žywjenje pregowała, pódšmarnjo decernent Michael Koch, zagronity za młoźinu, kubłanje a kulturu.
+++
Aktualne spadki wustatkuju se pozitiwnje na napołnjenje chóśebuskego pódzajtšnego jazora. Pśez wósebnu dowolnosć Bramborskego krajnego amta za wobswět smějo se jazor aktualnje z až na 1,9 kubiknych mejtarjow na sekundu pówódniś. Z tym dostanjo jazor prědny raz pó zachopjeńku pówódnjenja pśed 5 lětami srjejźlěśe wódu ze Sprjewi. Staw wódy w jazorje jo pak w slědnem casu lažko spadnuł, powěźijo górnistwowy koncern LEAG. Zawina jo sezonalne wuparjenje wódy a pókšacujuce zaśacenje wódy w srjejźi jazora.