Na BTU by dejali se teke ceptaŕki a ceptarje za serbšćinu wukubłaś, to pominaju Serby južo tak dłujko, ako jo znate, až w Chóśebuzu zachopiju z wukubłanim ceptarjow. Ale doněnta njejo se nic stało, rownož w drugich pśedmjatach južo młode luźe na ceptaŕstwo studěruju, na pśikład na matematiku a nimšćinu. Pśedsedaŕka Serbskeje rady Kathrin Šwjelina jo našomu programoju napśeśiwo groniła, až dalej wójuju wó studium serbskego ceptaŕstwa a až su dla togo w rozgronach. Gaž zewšym, buźo nanejjěsnjej wót nazymy 2025 móžno na serbske ceptaŕstwo w Chóśebuzu studěrowaś.
+++
Młodostne narodnych mjeńšynow se aktualnje zmakaju w pódpołdnjowej Nimskej. Cora su byli pla dańskeje mjeńšyny w Nimskej, su se woglědali mjazy drugim dańske městna w Flensburgu. Źinsajšny źeń stoj pód motom dolnonimskeje rěcy. Dalšne temy budu Frizy tak ako Sinti a Roma. Zmakanje trajo wót 19. do 23. julija, pódla su styri Górnoserby.
+++
Chwajtajśo, aby dostali hyšći pjenjeze. Załožba za serbski lud spěchujo teke znowa wjelike projekty. Ale te muse dłujkodobnje pśigótowane byś. Załožba ma frist až do 31. julija za wótedaśe projektow za pśiduce lěto z wolumenom spěchowanja wušej 10.000 euro.
+++
Nimska zeleznica njamóžo na nastupnosći narodnych mjeńšynow w Nimskej pśi planowanju swójich wobchadnych zwiskow źiwaś. To wuchada z wótegrona zeleznice Mjeńšynowemu sekretariatoju w Barlinju. Kaž zdźěli wjednik wótźělenja za póbitowańsku komunikaciju Nimskeje zeleznice, njamóžo zeleznica direktne zwiski do mjeńšynowych regionow financěrowaś. Pśicyna: nabranki z pśedawanja kórtkow su pśeniske. Pśedroge su teke pśipowěźeńki w mjeńšynowych a regionalnych rěcach. Za to dejali personal pśidatnje treněrowaś. Za awtomatiske pśipowěźeńki by kompleksne techniske pśiměrjenja trjebne byli. Slězyna wótegrona jo list pśedsedarja Mjeńšynoweje rady Nimskeje Karla-Petera Schramma na Nimsku zeleznicu a Zwězkowy ministaŕ za wobchad Volker Wissing, w kótaremž jo Schramm wótglědane šmarnjenje zwiskow do mjeńšynowych regionow kritizěrował.