10.10.2024 - Serbske powěsći wót 10. oktobra / Sorbische Nachrichten
Górna Łužyca startujo swójski Zorja projekt. Pód mjenim DOMOJ wabje wót něnta za to se pśizjawiś na 9-mjasecny intenziwny rěcny kurs górnoserbšćiny. Kaž pśi pśikłaźe w Dolnej Łužycy ma 12 wobźělnicow a wobźělnikow šansu cełodnjownje rěc wuknuś z pomocu stipendiuma. Dalej póbituju pó casu wobgranicowane wobźelenje za luźi, ako w serbskem wobłuku źěłaju. Kurs startujo znowa w aprylu a běžy až do decembra 2025. Až do 10. nowembra mógu se zajmce pśizjawiś. Jo to projekt Seśi za serbsku rěc a regionalnu identitu ZARI.
+++
Co cyni kulturu na lanźe tak jadnorazne w pśirownanju z tymi wjelikimi metropolami? A kótaru rolu maju pśi tom etniske mjeńšyny a małe ludnosći kaž Serby? Źinsa startujo k tomu konferenca w měsće Hannover, zgromadnje organizěrowana wót tamnego Centruma za inkluziwne bergaŕstwo Leibnitz instituta a Serbskego instituta. Serbski bok zastupujotej dwa dnja trajuce zejźenje wjednik wótźelenja za regionalne wuwiśe a šćit mjeńšynow, Lutz Laschewski a kulturna wědomnostnica Jenny Hagemann.
+++
Jadnučka postowa cołnaŕka zapakujo slědne pakety za tu sezonu. Poł lěta jo Andrea Bunar rozdźělowała kuždy tyźeń wěcej ako 600 listow, postowych kartow a zapisane pósłańki, tak ako jadnabo 80 paketow na Lědach pla Lubina. 65 tamnych domacnosćow dojśpijoš jano pó tšugach. W lěśu janu ze swójskeju mócu. Motor njejo w biosferowego rezerwata wót UNESCO dowólony. Wót witśego pójźo drogu pěśe pśez błośanske ławki.
+++
Bramborske kulturne ministaŕstwo startujo nowy spěchowański program. Wót 2.500 až na 150.000 euro mógu dostaś projekty, ako mócuju kulturne žywjenje w kraju. Eksplicitnje se teke projekty na dobro serbskego derbstwa spěchuju. Za to stajijo Bramborska jadnu milionu euro k dispoziciji. Až na 90 procentow mógu pšosbystajarje dostaś spěchowane. Kultura jo energije žrědło za strukturnu změnu, groni k tomu kulturna ministaŕka Manja Schüle. Kóńc zapódaśa za pśiduce lěto jo 10. nowember.
+++
Na Šusteroc kachlowej ławce powěda se źinsa wó serbske burske kazni slěpjańskeje wokoliny. Co su prědowniki něga wšo wěźeli wó wjedrje a natury, to pśeraźijo Juliana Kaulfürstowa, rěcna motiwatorka za slěpjański region. K tomu dajo dobru jězu pó slěpjańskich receptach. Źinsa zeger 15.00 na Šosteroc dwórje w Trjebinje.
Serbske temy do parlamenta / Sorbische Themen ins Parlament
Glědamy do Pódstupima. Hyšći koaliciske rozgrona běže. A tuchylu njamóžomy hyšći groniś, lěc koalicija mjazy SPD a BSW - Zwězk Sary Wagenknechtoweje se raźijo. Jasne pak, BSW stajijo 14 tych 78 městnow. Jadno wót nich ma Falk Pešel ze Złego Komórowa. Wón jo jadnučki zastupjaŕ BSW w Dolnej Łužycy. Dotychměst jo źěłał ako zagronity za serbske nastupnosći w měsće. To co cesnoamtski teke dalej cyniś, tak Pešel. Wón co mjeńšynowe temy, temy Serbow a teke powědarjow Dolnonimcow do parlamenta njasć:
o-zuk Falk Pešel
Wěcej wuspěcha wón wiźo we tom, za serbske temy w politice zastupowaś. Prědna adresa buźo za njogo togodla bramborska Rada za serbske nastupnosći, groni Pešel:
o-zuk Falk Pešel
Lěc z togo buźo, až na BTU Chóśebuz-Zły Komory se serbšćinarje wukubłaju, to lažy w rukoma pśiducego kněžaŕstwa. Wót togo se pomina Serbska rada dawno juž jasny signal. K tomu smy słyšali Falka Pešela. Za Zwězk Sary Wagenknechtoweje co wón serbske temy do parlamenta njasć. Za tyźeń 17. oktobra pśiźo nowy bramborski krajny sejm prědny raz gromadu.