Hyšći až do 15. decembra połdnjo zeger 12.00 jo móžno wuzwólowaś nowu Radu za nastupnosći Serbow pśi krajnem sejmje how w Bramborskej. To mógu pak jano wólaŕki a wólarje, ako su sebje zapisali až do 8. decembra do wólbnego zapisa. To jo pśedsedaŕka wóbnego wuběrka Margit Neugebauerowa hyšći raz k wěsći dała a co na to napominaś, "...až kuždy swóju šansu wužywa, tych wuzwóliś, ako w pśichoźe zajmy Serbow w Pódstupimje zastupuju." Tak jo to pisała w casnikaŕskej powěsći. Pódłožki deje wupołniś a pśipósłaś wólbnemu wuběrkoju. Lice jano te, ako su 15. decembra zeger 12.00 dojśli. Teke direktnje w Dešnje pla wólbnego wuběrka na głownej droze 44 móžośo je zatkaś do postowego kašćika. Zjawne wulicenje głowsow buźo 16. decembra wót zeger 10.00. Na samskem dnju wólbny wuběrk wuslědk wólby znate gótujo. A pón wót nas teke ned zgónijośo chto su nowe kandidatki a kandidaty 7. Serbskeje rady.
+++
Za lětosa su domowinske župy, kupki a towaristwa wšykne w gospodarskem planje pśedwiźone finance połnje wužywali. Dogromady jo Domowina 65.000 euro k dispoziciji měła, 25.000 euro su wužywali za župne projekty k spěchowanjeju serbskeje rěcy a kultury a 40.000 euro su pśetrjebali domowinske kupki a towaristwa. Wó tom jo domowinski prezidium na swójom slědnem pósejźenju togo lěta bilancu śěgnuł. Za pśiduce lěto su župy samo wěcej projektow zapódali, tak až pśedwiźona suma njedosega. Z tym buźo se prezidium w prědnem kwartalu dalej zaběraś. Teke pśigótowanje głowneje zgromaźiny Domowiny jo było tema. Wšykne cłonki su napominane, až do kóńca januara naraźenja za wobzamknjenja zapódaś.
+++
Zgromadnje za Łužycu cotej měsće Baršć a Chóśebuz w pśichoźe kooperěrowaś. Dojadnanje za to stej baršćańska šołtowka Simone Taubeneck a chóśebuski wušy šołta Tobias Schick cora pódpisałej. Cel jo wusćejše zgromadne źěło na komunalnem a gospodarskem pólu glědajucy na strukturnu změnu. Zgromadnje móžotej wobej komunje projekty lěpjej spěchowaś a socialnu infrastrukturu wutwariś. To pótrjefijo rowno tak zgromadne załoženje źěłaŕstwowych wobceŕkow, kooperaciju pśi twaŕjenju a zastojanju bydlenjow a pśi kulturje a sporśe. Pólěpšyś dej se image – naglědnosć – regiona.
+++
Chtož co teke lětosa gódowne pakśiki za popajźonych pakowaś, ma jano hyšći až do soboty togo tyźenja cas. Wó tom jo informěrowała faraŕka a serbska dušypastyŕka Katharina Köhlerowa z Dešna. Popajźniki w popajźeństwje w Dešanku su źěkowne za tu pomoc, pśeto njama źěl z nich kontakty k familijam, znatym a pśijaśelam. Chtož co pomagaś, dej na to glědaś, až směju pakśiki jano 5 kilogramow śěžke byś. Dowolone ako dary su zapakowane zežywidła, kafej, nimske a how kupjone cigarety a słodkosći. Zakazane su alkohol, medikamenty, kosmetika a teke šokolada, źož jo alkohol nutśi. Až do soboty 14. decembra mógu dariśele swóje pakśiki wótedaś w žylojskej cerkwi.
+++
Njejo tak dłujko, až smy w powěsćach informěrowali, až gósćeńc w Rogowje zacynijo. Dłujkolětny wobgóspodarjowaŕ Torsten Poßner jo znate cynił, až buźo wopśestaś źěłaś. Jo měł pak naźeju, až namakajo se rozwězanje. Ta naźeja jo se dopołniła: dłujkolětna sobuźěłaśeŕka buźo lokal wót nowego lěta dalej wjasć. Anne Schmidtowa jo fachnica za hotel a gastronomiju a se wuznajo z gósćeńcom, źož jo 5 lět južo źěłała. Za knigływjeźenje pśinjaso swóju sotšu sobu, kótaraž jo na tom pólu wukubłana. Rogojski gósćeńc, ten "Hornoer Krug", jo až to srjejź januara južo derje rezerwěrowany.
+++
Chtož lubujo ako gódowny bom jědłu, musy lětosa wěcej za taku zapłaśiś. Ako jo zwězk producentow informěrował, stupa płaśizna wó dwě euro na mejtaŕ boma. Zawina za pódroženje su wuše kosty za transport, zapakowanje a myta sobuźěłaśerjow. Teke płoniny za kubłanje gódownych bomow su se w Bramborskej reducěrowali.