Nowe myto za młodu ekselencu wubuźijo diskusiju. Na slědnem pósejźenju zwězkowego pśedsedaŕstwa Domowiny jo Rěcny centrum Witaj pśedstajił myto, ako dej wuznamjeniś luźi, kenž dolnoserbsku rěc na wusokem niwowje wuměju. Za to deje pśi pśespytowanju pó europskem referencnem ramiku za C1 dojśpiś dobre abo wjelgin dobre wuslědki. Rozpšawili su wó tom ako prědne Serbske Nowiny. Maksimalnje dwěma wósoboma na lěto co RCW za to 5000 euro daś. Jo to pśipóznaśe trjebnych kompetencow, tak wjednica RCW Beata Brězanowa. Cłonk pśedsedaŕstwa Běno Bělk jo relaciju myta do pšašanja stajił, wšak nejwuše myto Domowiny jano tysac (1.000) euro pśedwiźi. Prezidium domowiny co se něnt z mytom dalej zaběraś.
+++
Nakupiś w Pólskej – źinsa skerjej nic. Susedny kraj swěśi źinsa źeń njewótwisnosći. Na swěźenju wóstanu lody zacynjone. Źinsajšny narodny swěźeń spomina na njewótwisnosć pó wušej 120 lět trajuce źělenje kraja. Wjerašk buźo běg pósporomje nimsko-pólskeje granice, teke w bliskem měsće Słubice pśi Frankobrodu nad Odru.
+++
Marodny kjarchob, skóro žedna posta wěcej a byzaki na wejsnych drogach. To su jano někotare temy, ak' tuchylu bergarjow w Tšupcu zaběraju. Sobotu su se dla togo zmakali na źěłaŕnju do pśichoda. Wokoło 30 luźi jo diskutěrowało wó wětšych a mjeńšych žycenjach. Tak bytej juž dalšna ławka pśi busowej staciji abo wuměnjeńska berza za knigły žywjenje w Tšupcu wurědniłej. Sportowe towaristwo co wěcej cyniś za cystosć w gmejnje a skóro kśě zasej grafiti-akciju za młodostnych wugótowaś. Na zarědowanje pśepšosyła jo frakcija "Tšupc we wutšobje".
+++
Dokulaž pśecej wěcej fararjow felujo, zasajźiju se teke druge kśesćijany za namšy w našych jsach. W Mósće jo była cora jadnučka namša w nowembrje. Wugótował jo ju Hartmut Leipner z Chóśebuza, teke w serbskej rěcy. Za źinsa kažo mósćańska cerkwina rada zeger 14.00 na zgromadne kafejpiśe. Za pśiducu sobotu pśepšosyjo janšojska wósada na swěźeń swětego Mjertyna, kótaryž se zachopijo zeger 16.30.
+++
Pśerěznje, nic špatnje a teke nic pśeliš dobre, tak zni facit bóśonowego lěta. Dogromady 160 młodych ptaškow a 85 sedajucych pórikow su rangery w biosferowem rezerwaśe w Błotach licyli. Rozsuźecy jo było lětosa wjedro w juniju. Zymny dešć jo wjele młodym bóśonam pśisajźiło. Městno za wěcej bóśonow by było, groni Leonie Hubert wót pśirodoweje stražy. Wót 260 gnězdow nic razka połojca se wužywa. Bóśony su dawno pśec. W pśiducych mjasecach budu how wjele tych gnězdow pórěźaś, aby znowa zasej pśišli.