Krabatowa zakładna šula w Janšojcach-pódzajtšo jo sobotu, 11. januara, wótcyniła swóje źurja za woglědowarjow. Jadnučka zakładna šula we Łužycy, kótaraž póbitujo wšyknym wuknikam wucbu za nimsku ako teke serbsku rěc, jo pśepšosyła starjejšych ze źiśimi, kenž zastupiju w pśiducem šulskem lěśe do prědnego lětnika. Pó zeznaśu šule mógali starjejše pšosby na pśiwześe do šule stajiś. Pó prognozach šulskego wjednistwa buźo wót septembra 33 nowych wuknikow za blidach Krabatoweje zakładneje šule sejźeś. W Krabatowej šuli maju wšykne źiśi serbsku B-wucbu a 90 procentow ma bilingualnu serbsku wucbu. Dla togo ma janšojska šula ako jadnučka titel "Serbska zakładna šula". Wěcej k dnju wótwórjonych źuri w našom programje srjodu.
+++
80 Wjerbanarjow, Bramarjow a Rubynarjow jo woklapało stare lěto pětk wjacor. Nowy šołta Daniel Troppa jo jim prezentěrował zajmne licby. Tak źo wušej 10 procentow wobydlarjow do źiśownje. 182 źiśi maju w źiśowni a wušej 1.700 wobydlarjow. Gmejnske zastupnistwo jo wót lěśa pśisamem kompletnje wobsajźone z nowych cłonkow, tak až su se nejpjerwjej zjawnosći pśedstajili. Pśedstajił jo se teke nowy faraŕ Jan Mävers, kenž jo zagronity za wjerbańsku a bórkojsku wósadu. Lětosa dej se twariś nowa źiśownja, lice z kostami wót 6,1 milionow euro a cakaju aktualnje na twaŕske pśizwólenje.
+++
W Rownem su sobotu camprowali. Organizěrowany wót wejsnego kluba, su se zmakali małke a wjelike campraki zajtša na Njepilic dwórje. Tam su teke ned wótpołdnja te zacamprowane jaja zjědli. Reje su byli wjacor w hali za wšake wužywanje.
+++
We źiśowni we Syjku/Graustein jo był pětk Krajny raźc Sprjewja-Nysa Harald Altekrüger. Sobu pśišłej stej pedagogowka Domowiny Iben Lotric ako pupkowa grajaŕka a Romy Ruffowa, serbska zagronita we wokrejsu, wóna jo sobu grała we pupkowem graśu. Źiśownja jo južo w pśedpólu wupjakła nowolětka. Gósći su grali pupkowe graśe wót małeje sykory, a krajny raźc jo měł sobu teke dosć futra za ptaški. Jo to było wjelgin raźone pśigótowanje za ptaškowu swajźbu. Syjańska źiśownja ma južo tśi lěta dłujko dwójorěcne póbitowanja, wótkubłaŕki su se mógali pśez projekt wokrejsa Sprjewja-Nysa za to dalejkubłaś.
+++
Pśichod horta w Brjazynje stoj we srjejźišću zjawnego pósejźenja, kótarež wótmějo se srjodu wjacor w brjazyńskej zakładnej šuli "Mato Rizo". Na to smy kśěli na kuždy part pokazaś, dokulaž źiśi ga w šuli a teke w horśe serbski wuknu. Zastupniki gmejnow Brjazyń, Dešno-Strjažow a Góry pśidu gromadu, dokulaž jo licba wuknikow 2024 mócnje stupiła a dalej stupa a rumnosći w Brjazynje wěcej njedosegaju. Něnto pśemysluju pśitwariś, šulski dom pak jo ako pomnik šćitany, móžo byś, až wukniki muse w pśichoźe něźi hyńźi hyś do horta. Gaž se za to zajmujośo, dejali pśiś srjodu wjacor 18.30 do awle zakładeje šule "Mato Kosyk" na zjawne pósejźeje.