Prezidentka krajnego sejma Ulrike Liedtke napomina k wólbam noweje Rady za nastupnosći Serbow: "Chtož aktiwnje sobu cyni, móžo teke sobu wugótowaś. Źo wó to, Wašu serbsku identitu, rěc a kulturu zachowaś a dalej wuwijaś. Wužywajśo swój głos, aby serbske nastupnosći dalej słyšanje w parlamenśe namakali a kulturne gódnoty se pśiměrjone zastupowali."
Wšykne Serbowki a Serby w kraju Bramborska su wuwołane, swóje zastupnistwa za 7. Radu za nastupnosći Serbow pśi krajnem sejmje Bramborska (RASW) wuzwóliś.
Wólbne pódłožki a informacije
+++
Za nejwažnjejše góspodaŕske myto Bramborskeje "Brandenburger Zukunftspreis" jo lětosa nominěrowana firma ERIDES z Mósta. Firma zgótujo meble za berowy, za hotele a wótwaŕdowańske domy w regionje. Pśed 5 lětami jo syn załožarjow firmu pśewzeł a do pśichoda nastajił, digitalizaciju produktow a procesow we firmje póstarcył a glěda pśi góspodarjenju kšuśe na trajnosć. Za lětosne myto pśichoda jo 12 firmow z cełeje Bramborskeje nominěrowanych, te 6 dobyśarje se prezentěruju 22. nowembra w Barlinju.
+++
Pendlarje a drogujuce z Łužyce na droze wót a do Barlinja maju napinajucej tyźenja pśed sobu. Dla twaŕskich źěłow jo narownański wobchad z busami mjazy Chóśebuzom a Lubnjowom zarychtowany. Nimska zeleznica powěźijo, až muse na cerje wšake reparěrowaś a šyle (Schwellen) wuměniś. Až do 28. nowembra deje źěła gótowe byś. Drogujuce deje se docasnje wó narownańskich zastanisćach a casach informěrowaś na internetowych bokach Nimskeje zeleznice.
+++
Wenkowny wobraz Domowiny a nowy webbok towaristwa stej byłej temje pśi corajšnem zmakanju župankow a županow a pśedsedarjow cłonkojskich towaristwow z pśedsedarjom Domowiny, Dawidom Statnikom. Tuchylu źěła zastojnstwo Domowiny na pśeźěłanju webstrony kaž teke na zasadnem wustupowanju Domowiny. Nowa webstrona dej pśeglědnjejša byś a se na techniski aktualny staw dalej wuwijaś. Pótom změjo zasej kužda župa a cłonkojske towaristwo móžnosć swójsku pódstronu wugótowaś.
+++
Gódy w crjejowem kartonje/Weihnachten im Schuhkarton – tak se groni beneficnej akciji za źiśi na cełem swěśe. Něnto jo zasej cas za zpakowanje a wótedaśe kartonow. Organizatory dopórucyju miks z grajkow, šulskich materialijow a drastwy do kartona zapakowaś. Dary mógu se až do pónjeźelego, 18. nowembra, wótedaś, na pśikład w Chósébuzu w Sprjewinej galeriji, w radnicy w Lubjowje abo w Grodku w "Bergschlösschen".