15.07.2024 - Serbske powěsći wót 15. julija / Sorbische Nachrichten
Śěgi w pódpołdnjowej Bramborskej, teke do Sakskeje, zasej regularnje jězdźe, informěrujo Nimska zeleznica. Wšykne pśestajadła a signalowe załožki zasej funkcioněruju. Na chóśebuskem dwórnišću su reparěrowali datowy kabel, kenž su wobškóźeli pśed tyźenjom w ramiku twaŕskich źěłow.
+++
Mósćańska Domowinska kupka jo se cora z 12 cłonkami wudała na wulět do Noweje Cali. Tam su se woglědali kšasny park z grodom. Rowno tak su pak powědali wó drugich zgromadnych prědkweześach. Wóni ga se staraju teke wo Mósćański serbski swajźbaŕski pśeśěg. Ten se lětosa w septembrje pśedstajijo w Drjowku a w Hochozy. Znowa w maju wóswěśiju pón 50-lětne wobstaśe pśeśěga. Bóžko pak we Łužycy až doněnta njejsu nadejšli drugich takich pśeśěgow, kótarychž by kśěli na jubilejnem swěźenju pśedstajiś.
+++
Na pósejźenju Rady za nastupnosći Serbow wałtoru tyźeń jo se kritizěrowało a woblutowało, až cełe šulske lěto dłujko njejo była žedna serbska wucba w Drjowku a Lutolu. Zagronita za serbske nastupnosći wokrejsa Sprjewja-Nysa, Kerstin Kosakowa, jo pódšmarnuła, až stej byłej studentce zwólnej tam wupomagaś, ale njejo se z nima powědało. Wóna jo kritizěrowała lažkomyslne wobchadanje z tym póbitowanim a jo pódšmarnuła, až njesmějo se staś, až teke w pśichodnem šulskem lěśe tam žedne póbitowanja njebudu. Gósć na pósejźenju Serbskeje rady Torsten Mak jo z tym grozył, až budu se namakaś starjejše, kenž sebje wuskjarže pšawo na serbsku wucbu swójich źiśi.
+++
Rogojski archiw zgubjonych jsow buźo zacynjony ten a pśiducy tyźeń. Wót 30. julija jo zasej wótcynjony, srjodu a stwórtk wót zeger 10:00 do 17:00. Kuždu drugu njeźelu maju teke wótcynjone, pśiducy raz 4. awgusta wót zeger 14:00 do 17:00. Wustajeńca eksistěrujo jano hyšći pór tyźenjow – slědny raz buźo wótcynjona 13. septembra w ramiku nocy muzejow. Pótom se w Rogowje zacynijo a wobnowjona, mjeńša wersija buźo w nowem tekstilnem muzeumje w Baršću wót oktobra lěta 2026. Archiw dokumentěruju stawizny wótbagrowanych serbskich jsow.
+++
Źinsa se załožyjo wědomnostna pśirada Bramborskeje za klima. Rada płaśi ako wažna, aby dojśpiła Bramborska swój cil za šćit klima. Rada dej pśewóźowaś praktiske zwopšawdnjenje plana za klima a dej jogo sobu dalej wuwijaś. Bramborski plan za klima jo se w lětosnem měrcu wobzamknuł.
+++
Słowjański bajkowy festiwal / Slawisches Märchenfestival in Dissen
Sobótu a njeźelu jo Domowniski muzej w Dešnje pśepšosył na mjaztym južo ten stwórty Słowjański bajkowy festiwal. Wjednica muzeja Babett Zenkerjowa jo se wjaseliła, až jo tak wjele familijow ze źiśimi a enkelźiśimi pśichwatało. Na bajku wó starem a młodem mjadwjeźu, ako jo teke w Letiskej znata, na jawišću wence jo pśepšosył serbski pěsnjaŕ Bernd Pitkunings. Se wě jo teke muzikaliski rozwjaselił publikum, kótaryž jo sobu spiwał.
Wósebne dožywjenje jo było Wulicowańske źiwadło Machandel z Barlinja. Wuběrnje, z fantaziju a wuměłskim šykom stej tšojeńko wó guslowaŕskich knigłach a plonje pśedstajiłej Oliver Kube a Sylvia Ladewig. Wóna teksty sama pišo, ałtenraz jo se jej to z pomocu kolegi Olivera Kuby wjelgin raźiło, cełu bajku wulicowaś w luštnej, rymowanej rěcy. Se wě, gaž jo šło wó guslowaŕske knigły, pón jo teke plon sobu grał. A teke ta figura jo była pśewšo derje raźona. dorosćone su byli rowno tak zagórjone kaž jich źiśi. "Knigły połne pótajmnosćow" a ten plon se wě su žněli mócny pśiklask.
Wěcej zgónijośo witśe w našom serbskem połudnjejšem magacinje.