Wobšyrne pónowjenje B 97 mjazy Wórjejcami a Grodkom se dalej dlijo. Saněrowaŕ něgajšnych jamow LMBV z togo wuchada, až móžo źěła na wótrězku pla Sprjewinego Doła akle 2030 zachopiś. Ako pśicynu pomjenjujo dłujke procese dowólenja, techniske wupominanja a śěže z gruntami. B 97 wjeźo tam pó nasypje něgajšneje jamy. Pśiducy kšac ma byś testowe pólo pódla drogi. Tam kśě wopytaś, kak góźi se dno nejlěpjej skšuśiś. Za pónowjenje drogi lice z twaŕskim casom wót jadnab 10 lět, což jo za tam bydlecych a pendlarjow a wósebnje za wuwiśe města Wórjejce wjelike póśěženje.
+++
Nowotwaŕ Witaj-źiśownje "Milenka" w Rownem jo skóro dokóńcona. Pśi grajkanišću a zelenišću su w slědnych dnjach źěłali: grajne rědy natwarili, flastrowali a bomy sajźali. Steffen Seidelich, wjednik zastojnstwa za planowanje, twarjenje, górnistwo w zastojnstwowem zgromaźeństwje Slěpe jo gronił na slědnem pósejźenju gmejnskeje rady, až kśě teke slědne dny lěta dalej zaměrnje wužywaś: topjenje ma ze pśizamknuś a suchotwaŕske źěła dokóńcyś. Nowotwaŕ źiśownje w Rownem słuša k nejwažnjejšym twaŕskim napšawam w gmejnje Slěpe. Pó móžnosći zachopjeńk 2025 ma źiśownja gótowa byś. Pśeśěgnjenje wót doněntejšnego do nowego kubłanišća dej nejskerjej we februarje 2025 byś.
+++
Ze spiwom a zaběru su dolnoserbske familije slědny pětk swěśili swóju gódownicku w klubowni Dolnoserbskego internata w Chóśebuzu. Prědny raz njejo pśišeł ruprajcht ale źiśetko žognowat źiśi a zrownju starjejšych. Za někotare źiśi jo to był prědny woglěd źiśetka, ak jo měło za kuždu a kuždego małki darik. Dary su familije teke dostali wót Rěcnego Centruma Witaj. Ten jo rozdał wšake serbske knigły za młodych a młodostnych. Astrid Šramina wót Dolnoserbskeje kulturneje akademije jo pótom póbitowała wóskowanje na gódownych kulach. Za organizatora wót boka RCW Olek Draguła raźone wuzněśe togo lěta.
+++
Pśedgódowna atmosfera jo se kněžyła zachadny kóńc tyźenja teke w Bórkowach. Na dwanasćo dwórach su póbitowali warjone wino, młoge chłošćonki a móžnosći k baslenju a sobu cynjenju. Někotare dwóry su byli prědny raz pódla, ako na pśikład Kolonist w Bórkowach a prozninski dwór Liersch. W Mostaŕni Jank su natwarili małe gódowne wiki, z jawišćowym programom a ruprajchtom.
+++
W Mósće jo něnto we zymskem casu kužde pónjeźele wjacor pśěza. We gmejnskem centrumje zaběraju se z wałmu, pśěźenom, glickami a wšakim drugim wósebnje za serbsku drastwu. Christina Adamowa a Lydia Kastnerowa stej to zmakanje za rucne źěło naraźiłej. Wažne jo pśi tom teke mjazsobna wuměna a wuknjenje. Žedne z wobźělnicow ga su se teke južo wobźělili na wšakich kursach, teke za pšawe woblekanje burskeje drastwy. Mósćański swajźbaŕski pśeśěg wóswěśijo znowa swójo 50-lětne wobstaśe, teke za to kśě pśěžarki wšake pśigótowaś.