Za wuzwólowanje noweje rady za nastupnosći Serbow w Bramborskej su južo prědne potencielne kandidaty. Wó tom jo informěrowała wałtoru tyźeń pśedsedaŕka wólbnego wuběrka Marlis Neugebauer. Serbska rada ma 5 cłonkow a minimalne tak wjele kandidatow trjebaju. Naraźenja deje se zapódaś až do 28. oktobra pisnje pla wólbnego wuběrka. Kandidatki a kandidaty deje se na zgromaźinje cłonkow jadnogo serbskego towaristwa wuzwólowaś. Kužde towaristwo móžo až do 10 kandidatow naraźiś.
+++
Wuběźowanje "Serbska rěc jo žywa" nejpjerwjej wěcej njebuźo. Wó tom jo informěrowała pśedsedaŕka Serbskeje rady Kathrin Šwjelina. Zawina su skjaržby z gmejnow, až maju pśewjele źěła z tym wuběźowanim w pśirownanju z tym, až jo to skerjej symboliske cesćenje bźeze wjelikego financielnego myta, wót 250 do 1000 euro jo dostała jadna cesćona komuna. Teke za cesnoamtsku jury jo to było wjele źěła, dokulaž su dostali wótergi cełe zarědniki pólny materialijow. Serbska rada njejo pśišła na dobru ideju, na kaki part by mógali toś to wuběźowanje do pśichoda wjasć. Dla togo njejo wuběźowanje "Serbska rěc jo žywa" se wěcej wuwołało wót lěta 2019.
+++
Droga mjazy Bobowom a Myšynom se wutwarijo wob cas proznin. Wót stwórtka, 18. julija, buźo droga ceło zastajona, wót 31. awgusta dej byś zasej pśistupna. 700 mejtarjow teje drogi maju prědk wobnowiś, dalšna cera wót 1,5 km dej se wutwariś w lěśojskich prozninach znowa. Wokrejs Sprjewja-Nysa jo dostał za te źěła milionu euro wót kraja Bramborskeje. Droga jo depata a gaž se lejo, jo wjelike kališćo.
+++
W Tšupcu su załožyli za gmejnsku radu nowu frakciju z mjenim "Tšupc we wutšobje". Wó tom jo informěrował wjednik frakcije Manuel Pape. Frakcija stoj za wobydlarjam blisku politiku, kenž zmócnijo wejsnu zgromadnosć a pógónijo wuwiśe jsy, tak Pape. Dalšne cłonki su Fabian Schneegaß, Henrik Schulz, Manfred Jerol, Silvio Miethke a Dirk Anhalt.