Wažny termin jo źinsajšny 17. junij za pśiduce wuzwólowanje za bramborski parlament. Až do źinsajšnego wjacora 18 góźinow muse se wše partaje a politiske zjadnośeństwa pla wolbnego wjednika kraja pśizjawiś, kótarež kśě se wobźěliś pśi wolbach. To płaśi za take partaje a zwězki, kenž njejsu se až doněnta wobźělili. Wótedaś muse te partaje a zwězki rowno tak swóje wustawki a wolbny program. Stwórtego julija buźo bramborski wolbny wuběrk w zjawnem pósejźenju znate cyniś, kótare partaje a politiske zjadnośeństwa směju se wobźěliś za wolby za krajny parlament 22. septembra.

*****

Górnoserbska dramaturgowka a awtoŕka Jěwa-Marja Čornakec dostanjo źinsa lětosne sakske myto Handrija Zejlerja. Pśepódaś buźo myto sakska statna ministaŕka za kulturu a turizm Barbara Klepsch wjacor w Kloštaŕskej cerkwi w Kamjeńcu. To z 5.000 euro dotěrowane myto jo za pśesegajuce a pśikładne wugbaśa na pólu wuknjenja, wužywanja a pósrědnjanje serbskeje rěcy. Jěwa-Marja Čornakec dostanjo myto za swóje zasłužby na pólu serbskeje literatury. W Dolnej Łužycy jo wóna mjazy drugim znata ako awtoŕka tšojenjow wokoło serbskego krala slědnych inscenacijow swětki pśi Bismarkowem tormje w Bórkowach ze Serbskim ludowym ansamblom.

*****

Kraj Bramborska spěchujo lětosa wognjowe wobory z wěcej ako 30 milionami euro. Inwesticije su planowane za lěpšu infrastrukturu woborow, mjazy drugim za nowotwaŕ domow. We wokrejsu Górne Błota-Łužyca su to tśi wobory, kenž se spěchujo z krajnymi srědkami. Tak dostanjo Klěśišća (n.n. Klettwitz) 600.000 euro, Jazorce (n.n. Mallenchen) 360.000 a Tśikojce (n.n. Peickwitz), měsćański źěl Złego Komorowa skóro 400.000 euro.

*****

Załožba z fondom za šćit pśirody jo w zajźonem lěśe pěś projektow we wokrejsu Sprjewja-Nysa a jaden w Chóśebuzu pódpěrował. Wó tom jo informěrowała wótpósłańcka bramborskego krajnego sejma, Isabell Hiekel wót Zelenych. 166.000 euro su płaśili za wšake pśirodo-šćitne napšawy, mjazy drugim w Jatach (n.n. Jethe) pla Baršća a w Bóšojcach (n.n. Bohsdorf) pla Grodka. Město Chóśebuz jo dostało skóro 50.000 euro za napšawy w šćitanych stronach picańskich gatow, kótarež městoju słušaju. Spěchowali su se mjazy drugim projekty za zepěru wódy we Łužycy a za lěpše wuměnjenja za amfibije, bomy a krě za agrarnu krajinu ako teke nowe kwartěry za bóśony a njetopyŕje.

*****

Źinsa zachopiju se źěła za wutwaŕ drogowu we Wětošowje. Pótrjefjonej stej Wilhelm-Pieckowa-droga a Juri-Gagarinowa-droga. Twaŕske źěła deje traś dwě lěśe, a to až do awgusta 2026. Wobšyrne saněrowanje co krajny zawod za twaŕ drogow zwonoźeś we wěcej wótrězkach wót starego měsćańskego centruma až do dwórnišća pó docełego 1,3 kilomejtarju. Bramborski twaŕski ministaŕ Rainer Genilke buźo městoju witśe dopołdnja pśepódaś powěsć wó spěchowańskich pjenjezach za wutwaŕ drogowu.