Wó pśigóty na pśiducu głownu a wólbnu zgromaźinu Domowiny jo šło slědny pětk na pósejźenju zwězkowego pśedsedaŕstwa. Wuzwóliś buźo se mjazy drugim teke zasej městno pśedsedarja. Dotychměst jo ako jadnučki kandidat Dawid Statnik naraźony. Wón móžo se zepěraś južo na pódpěru župow Budyšyn, Kamjeńc a Dolna Łužyca, ako teke serbskego šulskego towaristwa a Serbskeje kulturneje informacije SKI w Barlinju. Za městno dwěju zastupneju pśedsedarjowu stej naraźonej Hartmut Leipner a Marlis Młynkowa. Dogromady kandiděrujo 22 wósobow za zwězkowe pśedsedaŕstwo Domowiny. Głowna zgromaźina buźo 5. apryla w Budyšynje.
+++
Źinsa zajtša jo startował wót Chóśebuza pomocny transport za Ukrainu. Initiěrował jo ten centrum za luźece pšawa. K tym nejwažnjejšym pomocnym wóram słušaju mediciniske rědy ako wumóžaŕske awto a lampa za operacije za chórownju w měsće Charkiv, rěd za dychdawanje za źiśecu chórownju w Odessy a pjeluchy za dorosćonych chórych a zranjonych. Wšykno jo se pśez dary organizěrowało.
+++
Połcas pśi projekśe UNESCO 5. Projektowe partnarje śěgnu pozitiwny mjazy-facit: zmócnjone zwiski mjazy Górneju a Dolneju Łužycu, kooperacije tych městnosćow swětowego derbstwa, zgromadne źěło z kubłanišćami – a wšuźi pódla to serbske. Referent pśi Domowinje Clemens Škóda wobkšuśijo, až worduju pśez projekt UNESCO 5 serbskej rěcy a serbska kultura we Łužycy wěcej widobne. Wušej 140 pśewódnikow su šulowali, stwórili pedagogiske materialije a graśa za šule, źiśownje a kubłanišća, wudali tśojorěcne publikacije a digitalnu platformu www.lausitz-kultur.de. Pśi wšom jo to serbske ten zwězujucy źěłk, tak Škóda. Hyšći do lěta 2026 projekt UNESCO 5 dalej běžy. Wón zwězujo Biosferowy rezerwat Błota, Mužakojski ług a Mužakojski park, Górnołužysku gólnu a gatnu krajinu a to serbske imaterielne derbstwo.
+++
Až do zajźonego pětka jo firma Strabag z Lubina stalowu konstrukciju za nowy móst na Lědach montěrowała. Z cołnami a pramami su až do 1,5 tunow śěžke grědy wót Lubnjowa do Lědow na twarnišćo transportěrowali. Z bagerom, kenž stoj w rěcce, su twaŕske źěle zešrubowali. 8 palow ze stalowego betona su za to w januarje do zemje zabili. Wšykne druge źěle za nowy móst ako stupy, wobłoźenje a płonina za pěskaŕjow budu z twardego drjewa, tak zagronity wót firmy. Gótowy byś dej nowy móst do muzeja pód gołym njebjom pó móžnosći južo zachopjeńk apryla, nejpózdźej pak až do jatš, gaž se sezona zachopijo. Za nowy móst musy město Lubnjow wěcej ako poł miliona euro zapłaśiś, druge srědki pśidu wót europskeje unije a kraja Bramborskeje.
+++
Złostnistwo žednje spi, se groni a złosnikaŕje pśidu pśecej z nowymi idejami. Tuchylu warnujo policija w Bramborskej pśed wopacnymi rucnikaŕjami. Take tuchylu dopórucyju luźam źěła w gumnje, saněrowanje kšywa abo cysćenje fasadow. Luźe pódpišu dogrona a napłaśuju prědnu sumu. Rucnikaŕje pón ale wěcej njepśidu.