Njewšednu powěsć mamy ako prědne za was: Team "Mudre wudry" Serbskego instituta jo se pětk a sobotu wobźělił na 24-góźinskem plěwanju w Chóśebuzu we plěwańskej hali Lagune. Dobył jo serbski team 3. městno. Tam móžomy jano gratulěrowaś. Startowała jo akcija pětk wótpołdnja z něźi 100 małymi a wjelikimi plěwarjami. Wugótowaŕ jo Nimske zjadnośeństwo za wuchowanje žywjenja, krotko DLRG. Ewent licy k nejwětšym šyrokosportowym zarědowanjam Nimskeje w plěwańskej hali. Mimo jadnotliwcow a "Mudrych wudrow" su se teke šulske rědownje wobźělili, wukniki mógu se na taki part dobru cenzuru w sportowem pśedmjaśe wudobyś. Mustwo "Mudre wudry" Serbskego institita jo lětosa prědny raz startowało.
+++
Stawnu wustajeńcu w bramborskem tekstilnem muzeju w Baršću tuchylu rozšyriju a modernizěruju. Za to jo zagronity za Łužycu bramborskego kněžarstwa, Klaus Freytag, slědny stwórtk pśepódał šek za spěchowanje ze 4,9 milionami euro. Pjenjeze pśidu z fonda za strukturne zmócnjenje wót kraja. Saněrowanje stareje tekstilneje fabriki a wutwaŕ ako moderny muzeum jo tuchylu nejwětšy twaŕski projekt Baršća. Pśedstajiju tam w pśichoźe 200-lětnu industrijowu historiju města, měsćańska zeleznica Jule buźo trajnje w muzeju a teke archiw zgubjonych jsow z Rogowa buźo w pśichoźe trajnje w baršćańskem muzeju.

+++
17 razow su wjelki nadpadnuli wužytne a domacne zwěrjeta we wokrejsu Sprjewja-Nysa a wokoło Chóśebuza w prědnem połlěśe. Wó tom jo informěrował krajny amt za wobswět. Za cełe łońske lěto 2023 su tam registrěrowali dogromady 65 nadpadow. Dwa raza su dejali we wokrejsu Sprjewja-Nysa wjelkowu zarědowaś ako problemowej wjelka. Lěc směju jagaŕje jich pak zastśěliś, rozsuźijo jano krajny amt za wobswět. Wjelki stoje pód šćitom, wobchadanje z nimi rědujo wjelkowe póstajenje Bramborskeje.
+++
Nowa seś co dolnoserbsku popularnu muziku dalej wuwijaś. Pśi prědnem zmakanju sobotu wó Chóśebuzu jo šło tym 15 muzikowym producentam, muzikarjam, tekstaŕkam a zajmcam wó zeznaśe a wuměnu. Móžnosći spěchowanja su w srjejźišću stojali, rowno tak ako wupominanja z rěcu. Wó jadnej žywej dolnoserbskej scenje njeby mógali hyšći powědaś, groni muzikowy redaktor Gregor Kliem. Wón pleděrujo za wuwijanje wóžywjeńskeje strategije paralelnje k rěcnemu planowanju. Wósebnje w subkulturje wiźi organizator Daniel Häfner potenciale, kótarež muse se profesionalizěrowaś. Syman Hejduška, producent z Górneje Łužyce žycy sebje wěcej zgromadnego źěła mjazy Dolno- a Górnoserbami. Chorowy wjednik Gerald Šejn pokažo na to, luźi na bazy, lěc chorowych spiwaŕkow abo młodych instrumentalistow, sobu wześ. Nowa seś co se dalej rozšyrjaś. W nalěśu jo pśiduce zmakanje planowane.
+++
Wósebnje "bomy žywjenja", ale teke druge skulptury a źěła z drjewa su mógali sebje zajmce woglědaś cora w Slěpem. Wuměłc Thomas Schwarz jo pśi góźbje dnja wótwórjonego ateljeja swóje twórby pokazał. Tuchylu producěrujo za něgajšnych miłoraskich luźi take bomy žywjenja a to z wósebnego symbolowego boma. Jo to kšawny buk, kótaryž jo dejał pšec z něgajšnego lěsa wokoło góńtwaŕskego groda. Cełe strony su wugloweje jamy dla wótbagrowali. Až do kóńca lěta dej toś ten projekt w nadawku energijowego koncerna LEAG zakóńcyś. Za 25 euro jo teke zasej nowy kalendaŕ "skulptury 2025" na pśedań, kótaryž stej slěpjańskej wuměłca Thomas Schwarz a Frank Stein zgromadnje naźěłałej.