Euroregion a wjelika wóda/Euroregion und Hochwasser
Prědne wólažcenje. Pó slědnej nocy prědne pegele zasej padaju. W Gubinje su cora wótcakali nejwětšu žwału, ale Nysa jo w swójom rěcyšću wóstała. Euroregion Sprjewja-Nysa-Bobr, kótaraž ma w Gubinje swój běrow, glěda pak na regiony w Pólskej, ako su pód wódu. K tomu Justyna Michniuk: o-zuk Justyna Michniuk
("Pótrjefjone su pśedewšym wójwodstwa Dolna Šlazyńska a Šlazyńska. Smy dostali informacije wót pólskich Euroregionow. W Jeleniej Górje jo situacija wjelgin zła. Pak nejgórjej jo w městach kaž Nysa. Smy w kontakśe z drugimi běrowami Euroregionow a buźomy wiźeś, co dajo se cyniś za pólskich kolegow.")
Euroregion jo signalizěrował pomoc za pótrjefjonych w Pólskej.
+++
Wustanišćo w Kibušu?/Haltestelle in Kiekebusch?
Nowa studija pśespytujo reaktiwěrowaś zeleznicowe cery a stacije w Bramborskej. Wobchadowy zwězk VBB jo ju do nadawka dał. Pśespytowanja deje hyšći něnto w tśeśem kwartalu togo lěta startowaś a traś do prědnego połlěta pśiducego lěta. Pódla Kibuša pla Chóśebuza se teke stacija Haida w Górnej Łužycy a dalšne cery wokoło Barlinja wobglěduju. Lěc se teke cera wót Łukowa pśez Mokra (Uckro) do Lubina zasej wóžywijo njejo jasne, to co VBB akle 2026 pśespytowaś.
+++
Omnibus za demokratiju/Omnibus für direkte Demokratie
Dwa dnja jo był tak pomjenjony omnibus za direktnu demokratiju w Chóśebuzu. Źinsa stoj w Picnju a wabi za wólby w Serbach, take do bramborskeje Serbskeje rady a do Serbskego sejma. Chóśebuski wušy šołta Tobias Schick to pódpěrujo a pódšmarnjo, až musy se demokratija wuwójowaś. Wóna jo žywa wót togo, až se sobu gótujo, tak Schick. Omnibus pódpěrujo wušej 20 lět w cełej Europje demokratiske projekty a akcije kaž bergaŕske iniciatiwy a bergaŕske rozsuźenja.
+++
Co se bórkojske žeńske za pśichod žyce?Zukunftswünsche von Burger Frauen
To jo tema diskusije a filmowego wjacora źinsa zeger 17.00 w bórkojskem Domje zmakanjow. Pśepšosyjo na to rada za žeńskecu politiku Bramborskeje a zagronita za rownostajenje Kerstin Möbes. Film "Die Göttliche Ordnung" tematizěrujo wójowanje młodeje žeńskeje w 70tych lětach w jadnej jsy w Šwicaŕskej. W diskusiji deje žeńske zwuraznjaś, co wót noweje gmejnskeje rady wótcakuju.
+++
Šmaranja w Drjowku/Schmierereien in Drebkau
Šmaranja a nacionalistiske parole su znanki wuglědali kóńc tyźenja w Drjowku. Wó tom informěrujo policija. Na wobchadowych znamjenjach w měsće a na błyšćaku pla Skjarbošca su namakali kokulate kśice. Fasada jadnogo supermarka jo se wobšmarała z kokulatymi kśicami, runami a pśeśiwo wustawje se měrjecymi parolami. Policija pady pśespytujo.