Wót corajšneje wobradujo bramborski krajny sejm, a to styri dny až do pětka. Něźi 70 dypkow stoj na dnjownem pórěźe plenuma. Źinsa źo mjazy drugim wó kazń za załoženje uniwersity za medicinske wukubłanje w Chóśebuzu. Rowno tak kśě pólěpšyś kazń za lěpšy šćit źiśi. Witśe budu wótpósłańcki a wótpósłańce wugódnośiś politiku kraja w casu koronoweje pandemije a skandal wokoło něgajšneje intendantki sćelaka rbb. Wobradowanje krajnego sejma jo slědne pśed lěśojskeju pśestawku a teje legislaturneje periody.

*****

Z woglědom jury w Radušu jo se cora zachopiła jadnasta runda wokrejsnego wuběźowanja “Naša wjas ma pśichod”. Teke w pódpołdnjowej Bramborskej wobźěliju se jsy, jich jo dogromady 14 jsow. Mjazy nimi su teke jsy w serbskem sedleńskem rumje ako Bobolce a Raduš pla Wětošowa, Radyń (Groß Radden) pla Lubnjowa, Kałkojce (Kalkwitz) pla Kalawy, Mukwaŕ pla Starego Darbna ako teke Tśikojce (Peickwitz), měsćański źěl Złego Komorowa. Až do stwórtego julija gódnośijo jury prezentacije we jsach pó jadnak póstajonych kriterijach.

*****

W Chóśebuzu zachopijo se źinsa seniorowy tyźeń. Moto jo “aktiwnje a sebjewědobnje, solidariski a sobu póstajane”. W srjejźišću tyźenja stoj pśipóznaśe a pócesćenje za źěło seniorow pśez kraj, město a seniorowu pśiradu. Wótměli su za to źinsa dopołdnja južo dwě zarědowani. W sportowem centrumje jo był tradicionelny nimsko-pólski sportowy swěźeń a w zalu měsćańskego doma diskusija wó strukturnej změnje a roli seniorow pśi tom. Swěźeńske zarědowanje pśi góźbje seniorowego tyźenja buźo witśe w Marijinej cerkwi w měsće.

*****

W Złem Komorowje filmuju wót pónjeźelego za kriminalny film. Jo to ko-produkcija sćelakowu ARD a rbb. Hyšći až do pětka budu měsćańske wiki, městna pśed chórownju, uniwersitu a policajskeju staciju rowno tak ako rozglědowański torm pśi złem-komorojskem jazorje kulisy za film. Wusćełanje filma w telewiziji jo planowany za pśiduce lěto nalěśu. Wěcej wó wopśimjeśu a sobustatkujucych njejo kśěła produkciska firma pśeraźiś.

*****

Kólasarje w Błotach mógu se wjaseliś. W Lubinje su modernizěrowali dwě kólasowańskej sćažce. Jadna wjeźo wót Reha-kliniki do gósćeńca Bukojca, druga do Noweje Niwy. Wobej sćažce słušatej do turistiskeje cery “górkowa kólasowańska sćažka”. Wudali su za to skóro 600.000 euro. Dalšna wutwaŕ sćažkow za kólasarjow jo planowana we wokrejsu Sprjewja-Nysa, a to mjazy wokrejsnym městom Baršć a měsćańskim źělom Jamne. Za tu sćažku su se pónjeźele źěla zachopili.