Tysac dnjow wójny Ruskeje w Ukrainje. Skóro tak dłujko bydli wokoło 1600 Ukrainaŕkow a Ukrainarjow w Chóśebuzu, ako jo namakało how swój schow. Tudejše wuběgańce wobogaśiju mjaztym mócnje kulturnu krajinu regiona. Mjazy jadnotliwymi akterami a wuměłcami wustupujo teke pšawdłownje nowy ukrainski chor "Paljanycja". Spiwanje w chorje jo kaž terapija, gronje někotare spiwaŕki.
+++
Wuspěšna kooperacija serbskich a waliziskich muzikaŕkow a muzikarjow źo do drugeje rundy. Kaž rozpšawijo Daniel Häfner wót projekta serbskego kulturnego a kreatiwnego góspodaŕstwa, jo dalšne zmakanje mjeńšynowu planowane w maju 2025. W ramiku SubSorb festiwala we Wórjejcach wokoło 17. maja su waliziske a serbske wuměłce pśepšosone, se wobźěliś na produkciji drugego muzikowego albuma. Slědne tak gronjone "serbsko-waliziske pśijaśelstwo" jo se wótměło 2022.
+++
Dalšny muzikowy wjerašk jo wěsty: Jadna tych nejwažnjejšych twóŕbow Korle Awgusta Kocora, oratorium "Nalěćo", pśiźo za połtera lěta do Chóśebuza. 26. apryla gastěrujo Serbski ludowy ansambel z tym w měsće. Planuju wjeliku produkciju zgromadnje z lajskimi chorami. Slědny raz jo se twóŕba pśedstajiła pśed 12 lětami w Chóśebuzu. Serbski ludowy ansambel buźo pak juž jěsnjej z gósćom: chor ansambla wugótujo zgromadnje z chorom Dolnoserbskego gymnazija w tamnej awli swětosny gódowny koncert a to 8. decembra.
+++
A hyšći informacija w swójskej wěcy: Rozgranjański format "Łužyca w rozgronje" librujo dalšne wudaśe: Wótněnta jo dłujki interview z něgajšym ceptarjom a wjednikom Dolnoserbskego gymnazija, spiwarjom a gercom Jurom Geru online.
W našom nowem online rěźe Christian Matthée se rozgranja ze Serbowkami a Serbami wó jich žywjenju a statkowanju za to serbske a to na jadnom městnje, kenž ma ze žywjenim rozgronowego partnaŕja cyniś.