Měto Nowak na Serbskem instituśe / Měto Nowak am Sorbischen Institut
Měto Nowak buźo wót 1. awgusta wědomnostny sobuźěłaśeŕ w Serbskem instituśe, w tamnem wótźělenju za regionalne wuwiśe a mjeńšynowy šćit w Chóśebuzu. Wó tom jo informěrował Serbski institut. Jogo źěłowe póla budu rewitalizacija dolnoserbskeje rěcy a pśirownujuca rěcna politika. Měto Nowak jo wjednik mjeńšynowego sekretariata w Barlinju wót 15. apryla, to źěło se kóńcy do 31. julija. Do togo jo był dłujkolětny referent za nastupnosći Serbow w bramborskem ministaŕstwje za wědomnosć, slěźenje a kulturu. W mjeńšynowem sekretariaśe w Barlinju buźo wót prědnego awgusta tśi njewobsajźonych źěłowych městnow wót dogromady styrich městnow. Domowina jo nosaŕ sekretariata.
+++
Start ferijowego tyźenja / Start sorbischer Kinderferienwoche
Źiśi startuju źinsa do serbskego ferijowego tyźenja. 9 źiśi wót 1. až do 4. lětnika zaběrajo se až do pětka grajucy ze serbskeju rěcu pód nawjedowanim Franciski Albertoweje wót Dolnoserbskeje kulturneje akademije. Akademija póbitujo mjaztym wěcej razow wob lěto w ferijach taki tyźeń. Zaśišće wót togo tyźenja słyšyśo pětk w Serbskem programje. Paralelnje wótmějo se wót źinsajšnego ferialny kurs Dolnoserbšćiny šule za dolnoserbsku rěc a kulturu.
+++
Ochranojska wósada swětowe derbstwo / Herrnhuter Brüdergemeine Weltkulturerbe
Łužyske městno snaź skóro swětowe kulturne derbstwo. Lěc pśiźo sedlišćo Ochranojskeje, Herrnhutskeje bratšojskeje wósady w Sakskej blisko Lubija na lisćinu, wó tom wobradujo w indiskem měsće New Dehli UNESCO komitej. Ned we wěcej krajach, w Nimskej, Irskej a USA procuju se Ochranojske sedlišća tenraz zgromadnje wó titel kulturnego derbstwa. Wót teje wósady załožony Christiansfeld w Dańskej jen juž wót lěta 2015 ma. Rozsud wótcakuju ten tyźeń pětk.
+++
Drjowk dostanjo spěchowanje / Lottomittel für Drebkau
Historiske jědro města Drjowk dej wěcej atraktiwne wordowaś. Źinsa zajtša jo pśepódał bramborski ministaŕ za infrastrukturu, Rainer Genilke lotowe srědki wó 6.300 euro. Z pjenjezami kśě stajiś mjazy drugim informaciske stele a tofle na historiski wažnych městnach w starem měsće. Projekt płaśi dogromady 8.000 euro.