Šyroku paletu serbskeje kultury – moderneje ako teke tradicionelneje - jo dožywiło cora wjele luźi na 15. Serbskem swěźenju. Na jawišću a pśed jawišćom w Puškinowem parku su se wšakorake kupki wšyknych starstwowych kupkow ze spiwami a rejami prezentěrowali. Zachopk jo wugótował Serbski ludowy ansambel ze swójim programom “Folklora!”. Wustupiła jo zasej muzikowa kupka nAund ze serbskeju popoweju muziku. Rejowańske kupki su byli z Barbuka, Zaspow, wót ansambla Pfiffikus a dolnoserbskeje kulturneje akademije. Wjele pśiklaska su dostali Rapper Stoi, nowa spiwaŕka Clara Valerie a Semišojc manźelskej z akrobatiku. Rejowański mejstaŕ Georgi Marinov jo z publikumom serbske reje nazwucował.
Ako pśecej su se pśi stojnicach kołowokoło serbske institucije, firmy a towaristwa prezentěrowali. Moderěrowałej stej program w nadawku serbskego programa rbb Diana Šejcowa a Gregor Kliem.

*****

“Zgromadnje do źěła” – tak jo bramborska ministaŕka za kulturu a wědomnosć Manja Schüle stwórtk w krajnem sejmje pśedstajiła drugu rozpšawu wó połoženju serbskego luda. Wóna jo se wuźěkowała wšyknym, kenž se wšednje zasajźuju za zdźaržanje a dalejdawanje serbskeje rěcy w źiśownjach, šulach, institucijach a towaristwach. Rozpšawa teje legislaturneje periody wopśimjejo analyzu wobstojnosćow tuchylneje situacije, glěda na statkownosć spěchowanja a informěrujo wó prědk-weześach bramborskego kněžarstwa. Tentyźeńske styri-dnjowne wobradowanje parlamenta jo było slědne pśed lěśojskeju pśestawku.

*****

Njeglědajuce na mjasece trajuce protesty opozicije jo słowakski parlament stwórtk w Bratislawje zjawno-pšawniski rozgłos RTVS rozpušćił. Na kóńcu jo zgłosowało wšyknych 78 wótposłańcow tych tśich socialno-demokratiskich a teje nacionalistiskeje partaje za tu kazń. Wótposłańce opozicije su z protestom plenarowy zal wopušćili. Kulturna ministaŕka Šimkovičová a ministaŕski prezident Fico stej pśecej zasej źěło rozgłosa kritizěrowali, měnjecej, až jo rozpšawjenje jadnobócne pśeśiwo kněžarstwa. Wót prědnego julija dej nowy sćelak STVR źěłaś z nowym wjednistwom.

*****

Za nowy kulturny a sportowy centrum w Bórkowach su pětk šwigawu swěśili. W pśiducem lěśe dej nowotwaŕ gótowa byś. Pón stoj za šulski sport k dispoziciji ako teke za sportowe a druge zjadnośeństwa. Rowno tak jo myslony za wjelike swěźenje, rucnikaŕske wiki, źiwadło, kino a koncerty. Městnow buźo za 800 luźi. Twaŕski projekt financěruju ze zjawnymi pjenjezami pó kazni za strukturne zmócnjenje. Lice z wěcej ako 20 milionami euro.

*****

W Złem Komorowje su ten tyźeń filmowali za nowy kriminalny film. Jo to ko-produkcija mjazy ARD a rbb, producent jo firma Moovie GmbH. Źěłowy titel bramborskego krimija jo “wrony a njaboge źowćo”. Filmowali su za to na wikach, pśed chórownju, staciju policije a uniwersitu w Złem Komorowje. Film dej se pokazaś nalěśu pśiducego lěta.