Pśi nas we Łužycy se zachopijo zasej cas za woblubowane žnjowne nałogi – stakim teke za kokot. Prědny kokot buźo kóńc tyźenja we Bórkowach. Statne rěcnikojstwo w Chóśebuzu jo se musało z nałogom togo kokota zaběraś. Łoni jo organizacija PETA wósoby wokoło slědnego Superkokota w Dešnje wuzjawiła. Proces jo rěcnikojstwo pak kóńc slědnego lěta połožyło k aktam, ako jo rbb něnto gronił. Pśicyna: Z togo wuchada, až se kokot wusmjerśijo bźeze špatnego wótglědanja – nimski pišu "vorsatzloses Handeln". Oficialnje pśiźo kokot ga pó swěźenju do gjaŕnca. Za rěcnikojstwo pśewažujo how šćit serbskego nałoga. PETA kritizěrujo dalej, kokot by se jano skóńcył, aby jogo śěło - citat "za njedowěrne nałogowe ewents znjewužywali". Wóni kśě se něnto wobskjaržyś pśi generalnem statnem rěcnikojstwje Bramborskeje a póśeguju se na pódobny pad w Nordrhein-Westfahlskej, tam su měli 2022 pśed sudnistwom wupěch. Wokrejs Sprjewja-Nysa ma k tomu jasne mjenjenje - kokot jo dowólony. Hynac jo to z nałogom, źož młoźina za žywym kokotom góni a jogo łapa. Ten jo mjaztym zakazany.