Bramborska ma něnto kazń za šćit a spěchowanje dolnonimskeje mjeńšynoweje rěcy. Krajny sejm jo ju slědny tyźeń stwórtk wobzamknuł. W njej se rědujotej na pśikład wužywanje dwójorěcnych wejsnych toflow a status rěcy w źiśownjach a šulach. Póstajili su teke status towaristwa Dolnonimcow “Platt in Brandenburg” ako kšywowy zwězk a nagranjański partnaŕ kraja, a rozsuźili su jogo financěrowanje we wusokosći wót lětnje 50.000€. Towaristwo Dolnonimcow, kenž jo něnto kšywowy zwězk, jo kšuśe wójował wó to, až rěc w šulach a źiśownjach se zawězujucy póbitujo. Dojśpili su formulaciju, až we źiśownjach móžo se dolnonimska rěc póbitowaś a we šulach dej se póbitowaś, gaž jo dosć zajmowanych wuknicow a wuknikow. Bramborska ma z tym ako prědny zwězkowy kraj kazń za spěchowanje dolnonimskeje rěcy.

*****

Nimsko-Serbske ludowe źiwadło Budyšyn jo w toś tej grajnej dobje w serbskorěcnych pśedstajenjach něźi 7.000 pśiglědowarjow měło. Póbitowało jo se pěś serbskich prapremjerow. Nejwuspěšnjejša jo była "Na drugem boce mjasecka - HERCY". To jo NSLŹ k wěsći dało. W nowej grajnej dobje dramaturgowka a zastupnica intendanta za serbske źiwadło, Madleńka Šołćic, dom wopušćijo. Jej slědujo w dramaturgiji Hanka Jenčec. Znowa witaś mógu w ansamblu grajaŕku Katarinu Krygarjec, kenž jo swój studij na źiwadłowej akademiji zakóńcyła. Źiwadłownica Petra-Marija Bulankec-Wenclowa dajo se na wuměńk, změjo pak dalej wjednistwo Serbskego źiśecego źiwadła.

*****

Krajny pśedsedaŕ Bramborskeje AfD René Springer jo se distancěrował wót koalicijowu wótpósłanych AfD ze stronu Die Heimat, to jo něgajšna pšawicaŕska strona NPD. Springer jo cora wobkšuśił, až w cełku tśi mandat mějuce wót AfD su załožyli koaliciju z Die Heimat, a to we Łuchowje (n.n. Lauchhammer) a we wokrejsu OSL. To jo pomjenił Springer ako wótše pśejźenje zasadow AfD a jo lubił, až co se procowaś wó to, až te tśi wótpósłańce se wuzamknu z AfD a jo se zagronił pla wuzwólowarjow AfD, až jo se to stało. We Łuchowje ma ta nowa frakcija samo mě AfDplus, tam jo mjaztym jaden wótpósłańc slědk stupił z teje koalicije. Springer co tej frakciji zakazaś pismiki AfD we swójom mjenju měś.

*****

Źinsa se zachopijo w Chóśebuzu źeń nimskich burow. Bury pominaju sebje wót zwězkowego kněžaŕstwa zlubjone wólažcenja, kenž su dejali pśiś dla se pśedrožujucego agrarnego dizela. Tam njejo se doněnta nic stało. Cora wjacor jo ampelowe kněžaŕstwo lubiło wólažceński paket, kenž pak njewótpowědujo wócakowanjam burow. Wóni pominaju wóttwaŕ běrokratije, zlažcenja pla dankow a mócowanje stawa burow pśi zwikowanju produktow. Prezident burow se nowo wuzwólijo, Joachim Rukwied zasej kandiděrujo. Źeń burow trajo až do pětka, w Chóśebuzu dej se z protestowymi akcijami licyś.