17 wobsejźaŕjow domow a gruntow w Žylowje maju masiwne škódy, napórane snaź wót tornado pónjeźele. To jo meteorologa z Potsdupima rozkładował. Kšywa su se wótekšyli, štorm jo bomy wuwrośiło a samo bydleński mobil jo zleśeł do gumna suseda. Druge wobydlarje měsćańskego źěla su w mjeńšej rozměrje pótrjefone, dokulaž su kamjenje kšywow jich domy trjefili. Wósebnje pótrjefjonej stej dwě droze: Škódojska a Chóśebuska. Dobrowólne wognjowe wobory Žylow a ze susednych jsow a měsćańskich źělow Chmjelow, Strobice a Depsk su byli ako prědne na pomoc, pótom jo pśišła z města powołańska wobora. Mjaztym su pśišli kšylce mjazy drugim z Janšojc, Chóśebuza a Gołkojc, aby žylojskim luźam pomagali. Druge nadawki pla luźi su pśesunuli.
+++
Pó komunalnych wólbach pśed tśi a poł tyźenjami zachopijo se za wolone parlamenty pšawe politiske źěło. Tak su cora gromadu pśišli wótposłańce z Wětošowa, aby parlament konstituěrowali. Źinsa zmakaju se k tomu w Lubnjowje a Kalawje, stwórtk we Łukowje. W Chóśebuzu wobraduju wolone cłonki měsćańskego parlamenta źinsa wótpołdnja prědny raz. How ma AfD 14 městnow a pomina za sebje funkciju pśedsedaŕja rady. SPD a CDU matej jano 9 a 7 městnow. A teke wokrejsny sejm Sprjewja-Nysa se źinsa w Baršću konstituěrujo. Teke how jo AfD z 38,2 procentami dobyła. Wóna ma 19 tych dogromady 50 městnow w sejmje. We wokrejsu Górne Błota-Łužyca buźo witśe konstituěrujuce pósejźenje sejma.
+++
Teke w dolnołužyskem wokrejsu Dubja-Błota pśigótuju se bergaŕske iniciatiwy a partaje na konstituěrujuce pósejźenje sejma. Pśedcorajšem su se partaje a kupki zjadnośili do jadneje frakcije. Tam zwězane su něnto wolone cłonki SPD/Zelenych/ Lěwice/My za Parsk a běrgaŕska iniciatiwa za Schönefeld. Na swójom zmakanju pónjeźele su wobzamknuli zgromadne dojadnanje ze zakładami a celami w nowej frakciji. Do njeje słuša 18 cłonkow wót tych 56 we wokrejsnem sejmje. Teke we wokrejsu Dubja/Błota jo dobyła AfD z 25,6 procentami pśed SPD z 18,5 procentami. Konstituěrujuce pósejźenje wokrejsnego sejma buźo tam pśiducu wałtoru w Lubinje.
+++
Kulturny centrum Krabatowy młyn w Carnem Chołmcu móžo se wjaseliś: Załožba lužyskego jazorišća jo pśepódała pósćiwanku we wusokosći 15.000 euro. Z tymi pjenjezami dej se lětosna inscenacija sobu financěrowaś. Myslone su pjenjeze za serbske drastwy a kostimy grajaŕkow a grajaŕjow. Lětosnej inscenaciji groni se "Im Anfang ist das Licht" a do jadnanja integrěrowane su historija a tradicije tamneje regiony wokoło Wŕrjejc w srjejźnej Łužycy.