Certifikacije we Witaj centrumje/Sprachzertifikat Niedersorbisch
Tuchylu běže zasej rěcne certifikacije pó europskem referencnem ramiku za dolnoserbšćinu. Rěcny centrum Witaj w Chóśebuzu jo slědnu sobotu styri wuknjeńce testował za niwow A2, ten tyźeń slěduju pětk a sobotu pśespytowanja wót B1 až do C1. Testowaś daju se tenraz tśi wótkubłaŕki, ako su wobzamknuli rěcny kurs we wokrejsu Sprjewja-Nysa. Drugi źěl su wobźělniki projekta Zorja. Zagronity pśi RCW Alexandr Draguła ma testy za wažne měritko, aby zwěsćili póstup pśi nawuknjenju Dolnoserbskeje rěcy. Wón sebje žycy, až se hyšći wěcej luźi za rěcny certifikat zajmujo.
+++
Propedeutikum za dolnoserbšćinu/Propädeutikum Niedersorbisch
Ten tyźeń stwórtk 3. apryla startujo propedeutikum za dolnoserbsku rěc. Sedym ceptarjow a wótnabocnikow w šulskej słužbje jo se za to pśizjawiło. To dajo pó napšašanju Serbskego programa k wěsći Gabriela Theiss wót statnego šulskego amta w Chóśebuzu. Zgromadnje z kubłańskim ministaŕstwom a sorabistiku w Lipsku organizěrujo šulski amt intensiwny kurs něnt k tśesemu razoju. Wóna jo gjarda, až pśecej teke luźi namakaju a nagranja serbsku towarišnosć wěcej sam wabiś za propedeutikum. Ten trajo lěto a styri mjasece. Kursisty mógu pón dalej hyś na master dolnoserbšćiny w Lipsku abo direktnje ako wótnabocniki serbšćinu pódaś w zakładnych a dalej wjeźecych šulach. Teke za wótkubłaŕki jo kurs wótwórjony.
+++
šlachtowanje w Radušu/Schlachtfest Slawenburg Raddusch
Na słowjańskem groźišću su kóńc tyźenja swěśili šlachtowanje. Tamny wobradowaŕ w serbskich nastupnosćach, Hajko Kozel, jo powědał wó šlachtowanju něga na jsach a zwězanych nałogach. Na kšomje swěźenja jo dał wobgóspodowaŕ groźišća David Chmelik wobkšuśił swój zajm na dogronje za derbne twaŕske pšawo wó 40 lět. Wót boka města njedajo k aktualnemu jadnanju hyšći žedno stojnišćo.
+++
Termin za zapódaśe pšosbow kóńcy/Anmeldefrist endet heute
Slědne dopomnjenje: Źinsa skóńcyjo pśi Załožbje za serbski lud cas za zapódaśe swójskich projektow. Pšašane su towaristwa zapódaś kulturne a rěcne projekty, ak deje se pśewjasć w drugej połojcy lěta. Pśiduca frista buźo akle kóńc julija.
Wšykne informacije na internetowem boku Załožby za serbski lud