Mediciniske zastaranje w Lubinje se skóro pólěpšyjo. W blišem casu wótcynijo nowy centrum za mediciniske zastaranje, tak mjenowany MVZ swóje źurja. Dwě lěśe jo za to trał planowański cas. Swóju praksu změjo tam pón teke gójc za powšyknu medicinu. Taki jo w Lubinje w slědnych lětach felował, tak až su pacienty z wokrejsnego města pśišli samo do Tšupca a drugich jsow we wokrejsu. Južo něnto mógu se luźe pśizjawiś, kenž kśě ako pacienty w pśichoźe do noweje praksy měniś.
+++
Kaka jo nejlěpša trasa za nowu sćažku za kólasowaŕjow mjazy Slěpom a Lěskom? Wó tom su slědny tyźeń diskutěrowali a prědny naśisk wuźěłali. Ten dej se w blišem casu w techniskem wuběrku w Slěpem pśedstajiś a rozpowědaś. Mimo togo kśě organizěrowaś pśepokazowanje pśiducego móžnego wobchada pśi kruželu w Slěpem. Južo w prědnem kwartalu nowego lěta kśě stajiś pšosbu za spěchowanje za sćažku. Zagronity za wšo jo město Grodk, dokulaž jo Lěsk měsćański źěl Grodka.
+++
Z wósebnym serbskim spiwom su Strjažowarje a Dešanarje wóswěśili lětosny adwent. Na corajšnych adwentnych wikach pśi strjažojskej zwónicy su zgłosyli tamne "Pśijasele spiwanja" spiw "Na póli su pastyrje". Strjažojske maminorěcne Serbowki su jen do źinsajšnego casa wobchowali. "Pśiduce lěto snaź pón ze wšyknymi wejsanarjami zgromadnje", tak to žycenje sobuspiwaŕki Christiny Kliemoweje. Teke źiśi strjažojskeje źiśownje a horta brjazyńskeje šule su pśedstajili w swójom programje serbske gódowne štucki a špruchy. Jo juž tradicija, až kužde lěto drugi adwent se w tej gmejnje na adwentne spiwanje zmakaju.
+++
Adwentny koncert Serbskego ludowego ansambla a šulskego chora Dolnoserbskego gymnaziuma njeźelu wjacor jo zagórił publikum w połnje wobsajźonej awli gymnaziuma. Wótwórił jo koncert chor wuknicow a wuknikow ze tśimi adwentnymi a gódownymi spiwami. Su spiwali wjelgin derje we tśich głosach pód nawjedowanim Geralda Šejna. Orchester ansambla jo grał štucki serbskich a drugich słowjańskich komponistow, na pśikład switu wórjechowego knapaka Tschaikowskego. Wjerašk jo był zgromadne spiwanje z publikumom, na to jo slědował bźezkóńcny aplaws. Do koncerta su wuknice a wukniki južo póbitowali kafej a tykańc.
+++
Rědny drugi adwent su sebje wugótowali w Slěpem. Kołowokoło slěpjańskeje cerkwje jo był gódowny mark. Wikowaŕje su dopórucyli wory a dary, druge su se starali wó śělne derjeměśe. Pśišłej stej ruprajcht a slěpjańske dźěčetko. W slěpjańskej cerkwi stej chor a pozawnowy chor wugótowałej koncert. Pód nawjedowanim kantora Björna Soboty su zaklincali za něźi 250 woglědaŕjow adwentne a gódowne štucki a kjarliže. Wó serbske spiwy jo se slěpjański folklorny ansambel starał. Kolekta pó koncerśe jo myslona za nowe orgele w slěpjańskej cerkwi.