Ceptaŕki a ceptarje Serbšćiny su wšuźi trjebne. Město Chóśebuz co pśichodne ceptarje ze stipendiumom pśiwabiś. Jano źinsa hyšći mógu se zajmce wó njen procowaś. Co su wuměnjenja za toś ten stipendium? Gaž coš mjasecnje te 500 euro dostaś, musyš studěrowaś na serbske ceptaŕstwo. To źo ga aktualnje jano w Lipsku. Pó wobzamknjenju źo pón za 5 lět do serbskeje wucby na jadnej chóśebuskej šuli, to jo winowatosć. Stipendium dostanu za dogromady 60 mjasecow, to groni dosegajo za kompletny studijny cas, gaž se pśichodne studenty něnto pśizjawiju. Taki stipendium dajo juž za wokrejs Sprjewja-Nysa a tam jo se pśecej jano mało luźi pśizjawiło. Šansa jo stakim dobra jen dostaś.
Dorost za serbske ceptaŕstwo felujo: 1.800 wuknicow a wuknikow trjeba w Łužycy ceptaŕku abo ceptarja. Nejwušu pótrjebu maju te 21 zakładne šule ze serbskim póbitowanim, how hyšći źo až do 2027 pśecej wěcej do renty. Ale teke tej dwě wušej šulskej centruma a Dolnoserbski gymnazium trjebaju wěcej. Pódla rěcneje wucby pytaju teke za bilingualnu wucbu ceptarje ze znajobnosćami za fachy kaž muziku, matematiku a stawizny. Chtož se za serbske ceptaŕstwo rozsuźijo, ma stakim źěłowe městno bejnje wěsty.
Ppśizjawjenja za pśiducy semester du pśez mail na bewerbung@cottbus.de.
Wěcej informacijow/Mehr Informationen