34. Film Festival Cottbus 2024 - 34. Filmowy festiwal Chóśebuz 2024
Wót 5. do 10. nowembra wótmějo se festiwal pódzajtšnoeuropskego filma FFC. Jo to lětosa ten 34. togo wjelgin wuspěšnego zarědowanja. Ceły tyźeń dajo wjelicki nawal w kinach města a centrum Chóśebuz swěśi zasej w módrej barwje. Słyšyśo how naše rozpšawa.
Das FilmFestival Cottbus ist eines der weltweit führenden Festivals, wenn es um das aktuelle Filmschaffen in Mittel- und Osteuropa geht. Vom 5. bis 10. November gibt es verschiedene Wettbewerbe und rund 150 Filme aus 40 Produktionsländern zu sehen. Hier unsere Berichte.
Zmakanje seśi łužyskich filmarjow
Lubowarje filmow a wósebnje teke serbskich filmow su zachadny tyźeń połnje na swóje košty pśišli na festiwalu pódzajtšnoeuropskego filma how w měsće. Mjazy drugim jo teke nejnowša produkcija wót filmarja Erik Schiesko "Serbska utopija 2" na festiwalu swóju premjeru měła. Chtož pak do wupśedanego zala Gladhousa njejo nutś pśišeł, móžo se film wót soboty teke ceło spódobnje wót doma woglědaś. My jen pokažomy we našom magacinje "Łužyca". Až ten film jo zewšym mogał nastaś, na tom ma teke ta seś łužyskich filmarjow swóju zasłužbu, ga cłonki seśi we filmje sobuźěłaju. Co ta seś we slědnem casu hyšći na nogi stajiła jo a na com aktualnje źełaju, to wulicujo nam Diana Šejcowa. Wóna jo pódla była pśi zmakanju seśi na filmowem festiwalu.
Filmaŕ Dirk Lienig z Wórjejc
Wót portrejowego wjacora filmarja Dirka Lieniga z Wórjejc rozpšawijo Gregor Kliem.
Serbske wjeraški na FFC 2024
Cora jo se festiwal pódzajtšnoeuropskego filma how w Chóśebuzu zakóńcył. Bźeze pśestawki jo město pśedekorěrowało: módre swětło festiwala jo pśec, pśed našym studijom stoj južo gódowny bom. Ale weto comy hyšći raz slědk glědaś na serbske wjeraški festiwala. Naša redaktorka Diana Šejcowa rozpšawijo.
Diskusija wó pśichoźe serbskich medijow
Łoni južo a lětosa zasej jo był serbski filmowy program na festiwalu wupśedany, tak až su pśiglědarje pominali za pśiduce lěto wětšy zal. Pśizamknuła jo se diskusija k pśichodoju serbskich wopśimjeśow pla zjawnopšawniskego rozgłosa. Pśepšosyła jo seś łužyskich filmarjow. Diskutěrowali su k pšašanjam ako: Kótare serbske póbitowanja dajo, kak se reprezentěrujo serbska žywjeńska realita we zjawnopšawniskem rozgłosu a kak su perspektiwy za serbske wopśimjeśa, nic jano pla MDR a rbb. Diana Šejcowa rozpšawijo.
AKCIJA-Film "Na slěźe błudnika" na FFC
Wótkul pśiźo dorost serbskego filma – to njejo zewšym tak lažko. Z mytom AKCIJA wuznamjenijo Šula za dolnoserbsku rěc a kulturu južo tśeśe lěto serbski filmowy dorost. Witśe prezentěrujo se w ramiku filmowego festiwala prědny raz film mytowarja slědnego lěta. Wó nastaśu filma “Na slěźe Błudnika” rozpšawijo Gregor Kliem.
Česke filmy na FFC
Česke filmy su lětosa jaden "Special" na festiwalu pódzajtšnoeuropskego filma, Diana Šejcowa jo se woglědała program českich krotkofilmow "Žeńskecy wid" a film, kenž jo źěl głownego wuběźowanja: "Mord (Our lovely pig slaughter)".
Sami film "Je’vida" na FFC
Swóju rěc a kulturu zaprěwaś pód śišćom a šikanami wětšyny. To jo něco, což njejsu jano Serby w swójej historiji dožywili. Bólecy kapitel samiskeje historije jo źinsa wiźeś na Filmowem Festiwalu w Chóśebuzu. Gregor Kliem rozpšawijo wó filmje "Je’vida".
Prědne filmy na FFC
Źinsa jo tak daloko – Chóśebuz jo zaswětlony w śamnomodrem swětle. Filmowy festiwal Chóśebuz startujo. Mjaztym až se pśepšosone gósći w Statnem źiwadle na swětosnem wótwórjenju wobźěliju, pśedstajijo wam Gregor Kliem tśi dalšne filmy źinsajšnego wjacora.
34. festiwal pódzajtšnoeuropskego filma startujo: Rozgrono z kulturnym redaktorom Greogorom Kliemom
Co nas wótcakujo na lětosnem filmowem festiwalu? Kulturny redaktor Gregor Kliem jo južo raz do programa festiwala glědał.
Was erwartet uns beim diesjährigen FilmFestival? Kulturredakteur Gregor Kliem mit einem Blick ins Porgramm.
Filmowy wjacor "Kaleidoskop" / Filmabend "Kaleidoskop"
W Chósébuzu buźo zasej filmowy festiwal pódzajtšnoeuropskego filma. Ten festiwal, kenž śěgnjo za jaden tyźeń fachnikow a pśipóznatych wuměłcow z wjele krajow do Łužyce. Zachopjeńk jo był wjele lět filomowa pśeglědka w kinje Weltspiegel, jaden woblubowany podium za filmarjow z našogo regiona, lajskich a semiprofesionelnych. Ale toś ta pśeglědka wěcej njejo. Za to jo był pětk wjacor filmowy wjacor “Kaleidoskop”. Wótgłos publikuma na te filmy jo był wjelgin dobry, jich jo było wokoło 60 pśibytnych. Filmowa pśeglědka w kinje Weltspiegel w slědnych lětach pak jo pśiwabiła wjele wěcej luźi a jo se wótměła teke we drugem ramiku, glědajucy na personelne a financielne zastaranje, ale teke prestiž zarědowanja. Wót šefow FFC njejo se pśedcora wjacor nicht pokazał. Ines Neumanojc rozpšawijo.
W pśedpólu festiwala: rozgrono ze Sylku Laubensteinoweju-Polencojc
Co buźo lětosa nowego pśi serbskem filmje: W pśedpólu festiwala jo se Anja Kochojc-Šwarcowa rozgranjała ze Sylku Laubensteinoweju-Polencojc. Wóna wót boka Załožby za Serbski lud dłujke lěta južo pśewóžyjo wuwijanje serbskego filma.
Was gibt es neues beim sorbischen Film? Im Vorfeld des Festiwals unterhält sich Anja Koch-Schwarz darüber mit Silke Laubenstein-Polenz von der Stiftung für das sorbische Volk.