Jogo wutšoba jo biła pśecej za Dolnu Łužycu. Rožony Rogeńcaŕ, komponist, Detlef Kobjela jo dłujko, pópšawem nejwětšy źěl žywjenja bydlił a statkował w Budyšynje. W Dolnej Łužycy se luźe pak nic dla jogo wjelikich orchestrowych twóŕbow na Kobjelu spominaju ale dla něco drugego. Za Dolnu Łužycu jo spisał a zawóstajił něco rowno tak gódnego: Wěnc serbskich ludowych arijow. Spiwali su jen zjadnośone dolnoserbske chory. 2. nowembra su se serbske chory zasej zmakali aby na Kobjelu a jogo statkowanje za Dolnu Łužycu spominali. Słyšyśo how wurězki koncerta. Pśez program wjeźo Was Gregor Kliem.

Jaden koncert za Kobjelu – něco wósebnego a teke něco wósobinskego, jo gronił nam chorowy wjednik a organizator Gerald Šejn krotko do koncerta w Hochozy.
75 spiwaŕkow a spiwarjow wót styrich chorow jo Gerald Šejn dobył za koncert we gósćeńcu "K złośanemu plonoju".
Pśed 150 luźimi jo ako prědne wustupił Błośański žeńskecy chor z Lubina. Pśiduce lěto swěśi ten chor swójo 50-lětne wobstaśe. Wót chora z Lubina słyšyśo dwa spiwje, ak jo Kobjela za njen wobźěłał: "Póstrowjenje Błotow" pó teksće Fryca Rochy, a ludowy spiw "Chto to wěri, kak to bóli".
Teke za chor "Łužyca" jo Kobjela wóznamjenił wjele. Wót togo chora słyšyśo tśi kradu znate ludowe spiwy: "Ha pśijěł panik do Błotow" a "A pśecej nam njej' móžno gromaźe byś". Nawjedujo chor Thomas Döding.
Njejsu jano spiwali na koncerśe 2. nowembra. Kobjela jo zawóstajił bejny rěd komorneje muziki, kótaraž dopokažo rowno tak ako jogo spiwy dobre zacuśe za melodije a atmosfery. Budyšynojc Almut a Esther Budyšyn z Bórkow stej wupytałej dwě twóŕbje, ak matej teke něco z nima cyniś. "Póžedanje" – to jo baseń Bórkowaŕki Miny Witkojc. Słyšyśo twóŕbu we wersiji za klawěr a cello. Pótom slědujo Kobjelowy "Duo". Jo to jogo prědna komornomuzikowa kompozicija, spócetnje spisana za dwě źowći na tegdejšej Serbskej rozšyrjonej wušej šuli. Teke Almut a Esther stej byłej na pózdźejšem Dolnoserbskem gymnaziumje. Za koncert stej wobźěłałej twóŕbu za cello a flejtu.
Kobjela by se wjaselił, gaby hyšći dožywił, kak w Janšojcach mjaztym to spiwanje zasej wětšu rolu grajo. Někotare lěta dajo zasej muskecy chor. Źěkowano wjednikoju Geraldoju Šejnoju su sebje naźełali bejny serbski repertoire. Teke za koncert w Hochozy su ekstra serbske štucki wót Kobjele nazwucowali. A z tym tamny žeńskecy chor mócnje pódpěruju. Słyšyśo "Źo jo mój dom" a "Doma, doma rědnje jo".
30 wuknikow wót 5. do 12 lětnika jo spiwał: jadnorazny naglěd. Chor Dolnoserbskego gymnazija jo se akle pśed krotkim pó śěžkem koronowem casu zmógnuł. Za wjele wuknicow njejo to było jano prědny wustup – ned z nagrawanim – bejnje wupominanje – ale teke prědny raz, až su měli šansu gjarźe serbsku drastwu nosyś. Gjarde zawěsće teke ta mań starjejšych w publikumje. Chor DSG zaspiwajo: "Spiw Błotam" a "Wjacorne zacuśe". Na klawěrje grajo Lennard Ramscheck.
Ku kóńcoju koncerta – ten wjerašk. Janšojski chor, Lubinske žeńske a chor "Łužyca" su se zgromaźili za dwa spiwa z Kobjelowego wěnca serbskich arijow: "Serbam" pó teksće Fryca Rochy a "Narodnej zemi" pó teksće Jakuba Barta Ćišinskego. Dirigěrujo Gerald Šejn, pśi klawěrje zasej Lennard Ramscheck.

Zašaltujśo teke pśiducu njeźelu (24.11.2024, 12:30) naš serbski program. Pón pśinjasomy drugi źěł togo wósebnego wjacora k spomnjeśu na Detlefa Kobjelu. Pó chorowem koncerśe njejo ga było hyšći kóńc. Pó zgromadnem spiwanju z publikumom jo zagrała dujaŕska kapała “Łužyca Blach/Lausitz Blech". Tu góźbu njejsmy skomuźili, teke jich koncert nagraś.

Sein Herz schlug immer für die Niederlausitz. Der sorbische Komponist Detlef Kobjela, gebürtig in der Niederlausitz in Willmersdorf, hat lange, lebte und wirkte eigentlich den größten Teil des Lebens in Bautzen. In der Niederlausitz gedenken die Menschen jedoch nicht wegen seiner großen Orchesterwerke Kobjelas. Für die Niederlausitz verfasste und hinterließ er etwas ebenso Wertvolles: einen Reigen sorbischer Volksarien. Am 2. November trafen sich niedersorbische Chöre wieder, um an Detlef Kobjela und sein Wirken für die Niederlausitz zu erinnern. Hier hören Sie Ausschnitte des Konzertes. Durch das Programm führt Gregor Kliem.

Schalten Sie auch nächsten Sonntag, den 24.11.2024, ab 12:30 Uhr unser sorbisches Programm ein. Dann bringen wir den zweiten Teil dieses besonderen Konzertabend zum Gedenken an Detlef Kobjela. Nach dem gemeinsamem Singen mit dem Publikum spielte die Blaskapelle "Lausitz Blech".