Jaden part Pratyje jo ako pśecej za źiśi a młodostne myslony. Luštne wulicowańka, basni a portrej 10lětneje na wšaki part wobdarjoneje Mary Winzerojc caka na młodych cytarjow. Mimo sporta a rejowanja jo jeje lubša zaběra stykanje kwětkow a nazymskich płodow a ... gótowanje šokolady pó swójskich receptach.
Druge pśinoski wulicuju wó zasłužonej serbskej ceptaŕce na tencasnej SRWŠ abo rozestajaju se z pśichodom Serbstwa ze slězynu strukturnych změnow.
Co źarže wó genderowanju w serbskej rěcy abo kak se cesće serbsku drastwu, to móžo cytarja pógnuś k pśemyslowanjeju.
Wažny źěl kalendarja jo Pratyja za kśěsćijanow. Serbski faraŕ na wuměńku Ingolf Kśenka powěźijo wó drogowanjach do Swětego kraja a Dieter Schütt wugronijo swóje mysli k bjatowanju. Dalšne awtory spominaju na prědnu dolnoserbsku bibliju pśed 200 lětami abo jubilej - 30 lět Spěchowańskego towaristwa za serbsku rěc w cerkwi.
Wjele zgónijomy wó źiśecych lětach Kita Šwjele we Zaspach, namakajomy powěsći ze starych Casnikow wót lěta 1902. Fotowa galerija ze Zaspow pokazujo na serbske tradicije a žywjenje we něgajšnej jsy. za to mamy se źěkowaś fotografoju Thomasoju Kläberoju, kótaryž jo ze swójimi fotami wobogaśił Pratyju 28 lět. W toś tej Pratyji slědny raz.

Pśi cytanju togo gronka mógał luź se mysliś, až jo wóstudno až tšach w titelnej jsy noweje Pratyje. Ale to njejo wěrno – cytajśo a woglědajśo se zaspicke pśinoski a bildki! W Pratyji za źiśi pśeraźijo wam Mara Winzer ze Zaspow, kak swóju šokoladu gótujo. W Pratyji za kśesćijanow cytaśo wó prědnej dolnoserbskej bibliji, ako jo se wudała 1824, ale njejo se biblija pomjeniła. A w nimskem źělu zgónijośo mjaz drugim wó genderowanju w dolnoserbšćinje a wó prědnej serbskej załožbje, wobstojecej wót 1789 do 1924.
Dalšne temy: platoniska lubosć Wylema Šybarja, Miłoraz a strukturna změna, pśisud Mollerowych spiwaŕskich w běgu 450 lět, nimska wójnska baseń z lěta 1813 a jeje dolnoserbske pśebasnjenje 1913, konsekwence za nosenje Beatles-t-shirta na SRWŠ w lěśe 1969 a hyšći wjele wěcej.

Dogromady 55 pśinoskow wót 10 awtorow cytaśo we nejnowšej dolnoserbskej Pratyji. Nejstaršy awtor jo Erwin Hanuš z 88 lětami, nejmłodša – 10lětna Mara Winzerojc ze Zaspow. Wšo jadno lěc se zajmujośo za cerkwińske temy, stawizny, nałogi, basni. Kuždy namakajo we Pratyji něco zajmnego. Lazowanje se lonujo za kuždego! A k tomu rědne fota wót Thomasa Kläbera.

Pratyju dostanjośo mjazy drugim w Serbskej kulturnej informaciji Lodka we Serbskem domje w Chóśebuzu a w Ludowem nakładnistwje Domowina.

Serbska pratyja 2024
redakcija: Gregor Wieczorek
Ingrid Hustetowa - Pratyja za źiśi
Martina Golašojc - Pratyja za kśesćijanow
titelowe foto: Thomas Kläber

ISBN 978-3-7420-2759-7

Das niedersorbische Jahreskalendarium "Serbska Pratyja" gehört seit vielen Jahren zu den am meisten gelesenen sorbischsprachigen Publikationen des Domowina Verlags. Einmal jährlich erscheint die Sammlung von Aufsätzen, Beiträgen, Gedichten, historischer Rückblicke und Fakten aus dem alltäglichen wendischen Leben. Kürzlich wurde der Buchkalender "Serbska Pratyja" für 2024 in Saspow vorgestellt.