Dowol wóstanjo droga wěc a wordujo pśecej drošy w Nimskej. Na gluku dajo pomoc. Ale jano połojca pśistajonych - te ako su w tarifowych dogronach - dostanjo wót źěłodawarja dowolowe pjenjeze. W pśerězku 1600 euro brutto ekstra. Nanejmjenjej 40 euro wěcej ako łoni. Glědamy pak do pódzajtšneje Nimskeje, how dostanu 40 procentow mjenjej, jano wokoło 1200 euro za dowolowu kasu, dokulaž w pódwjacoru nadalej myta wuše su. Kótary trošt móžomy wam daś? Njemusy ga byś lět do Karibiki. Pjerwjej raz dołoj pśiś ze wšyknym. Daś dušy měŕ a nic ned na pjenjeze se mysliś. To cyni Louisa Kossick how pšawje w źinsajšnem Prozninskem spiwje.

Do dowola jěś bźeze špatnego swědobna – nic tak lažko. Za wětšynu njejo doma wóstaś pak žedna alternatiwa. Pón ga derje, až se teke w dowolowych cilach něco stawa:
Turizm w Grichiskej ma pšawy dilema. Na jadnom boku dožywiju katastrofalne wognja w gólach, pówódnjenja, suchotu, temperatury wušej 40 gradow. Na drugem boku su ceło wótwisne wót turizma. 2 miliardow euro wudajo kněžaŕstwo dla tog za napšawy – na pśikład za recycling wótpadkow, na kupje Tilos šafnu to samo k 90 procentam.
W italskem měsće Rom kśě sto tysac nowych bomow sajźaś, aby se mjenjej gósći w śopłośe kidnuło.
W Chorwatskej kśě alternatiwne ekologiske destinacije spěchowaś, aby nimske turisty njenatykali te woblubowane města kaž Dubrovnik.
Ale teke wu nas se něco stawa – we Warnemünde, w Mecklenburgskej, dostanu te kołojězdne łoźi milinu wót kraja a njezagaduju město pśi mórju ze smjerźecym dizelom.
Doma wóstaś snaź doch njejo špatna ideja... How spiwa Wiebke Reichenbach - ta se teke wjaseli...