Fašing a karnewal stej muzikaliski tema w našom programje. Zachopjeńk pětego lětnego casa comy cesćiś teke w našej muzice tyźenja a grajomy kuždy źeń jaden pasujucy spiw.
Naš format "muzika tyźenja" pśiwobrośujo se kuždy tyźeń jadnej aktuelnej temje, wósobje abo tšojenju. Ten tyźeń grajomy wam spiwy, kótarež su zwězane ze znatym we Serbach mjenim: Rožamarja Šenkarjowa.
31. oktober jo źeń reformacije. To jo póstark, aby se tenraz muzika tyźenja zaběrała z teju temu. Powšyknje datěruju zachopjeńk reformacije na lěto 1517, ako jo Martin Luther wózjawił swójich 95 tezow. K temje grajomy Wam spiwy ze słowjańskich krajow.
Na schadowankach smy dožywili pśecej zasej luštny program, ze spiwom, źiwadłowymi graśami, ale pśedewšym – z humorom. Gymnazisty, absolwenty a studenty su pśecej kradu kreatiwne byli. Smy dla togo jubileja wupytali luštne abo satiriske spiwy.
Wušej 75 lět dajo mjaztym serbsku muziku w rozgłosu. Gaž sćo se pšašali, wótkul wšykna ta muzika pśiźo – w tych prědnych lětach jo była jadna wósoba za to zagronita: Beno Njekela. 05.10.2024 by wordował Njekela 90 lět stary.
Europejski źeń rěcow stwórtk, 26. septembra, jo góźba, aby se w rěźe muzika tyźenja zasej raz pśiwobrośili wěcejrěcnosći w Europejskej uniji a se pódali na pytanje za muzikaliskimi drogotkami.
Naša muzika tyźenja tematizěrujo tenraz temu: politika. Zawina za to su wólby w Bramborskej za tyźeń. Poměr mjazy muziku a politiku jo kompleksny a móžoš měś k tomu pśistup ze wšakich bokow.
Kóńc tyźenja buźo we Hochozy 19. Bramborski wejsny a žnjowny swěźeń. Rownocasnje swěśe jubilej 520-lětnego naspomnjenja jsy. Na tśich dnjach buźo tam wjeliki ruš a program za wšykne generacije. We rěźe "Muzika tyźenja" pśiwobrośujomy se tomu wjelikemu swěźenju.
Nic jano šula jo se zasej zachopiła ale teke wšake kulturne aktiwity. Teke kupka Serbska reja pśepšosyjo zasej na rejowański wjacor. Za nas góźba, aby ten tyźeń wam zagrali kuse w interpretaciji teje kupki.
